کراچی(مانیٹرنگ ڈیسک)آج کل پاکستان میں شادیوں کا سیزن ہے اور ہر کوئی اپنی شادی کو یادگار بنانے کیلئے نت نئے اور انوکھے طریقے اختیار کر رہا ہے، ابھی گزشتہ دنوں رحیم یار خان میں ہوئی ایک شادی کو یادگار بنانے کیلئے دولہا کے دوستوں نے دلہن کے شہر پہنچتے ہی ڈالروں ، ریالوں اور موبائل فونز کی بارش کر دی تھی ، اس قدر پیسہ لٹایا کہ بارات کی ویڈیو سوشل میڈیا پر تیزیسے وائرل ہوئی
اور ایف بی آر حکام تک کو نوٹس لینا پڑ گیا اور بارات پر لٹائی دولت کے حساب کتاب سمیت دولہااور دلہن کے اہل خانہ پر بھی تحقیقات کی تلوار لٹک گئی۔ اب کراچی میں ایسا تو کچھ نہیں ہوامگر این ای ڈی کے انجینئر نے اپنی شادی کو یادگار بنانے کیلئے بیگم کو اپنے ہاتھ سے تیار کیا گیا روبوٹ تحفے میں دے دیا ہے۔ ایلیسین نامی اس روبوٹ نے نہ صرف شادی میں بھرپور شرکت کی بلکہ نہایت شاندار طریقے سے شادی پر آنیوالے مہمانوں کو خوش آمدید کہہ کر سب کو حیران کر دیا۔ انجینئر دولہے میاں نے شادی یادگار بنانے کیلئے روبوٹ اپنی نئی نویلی دلہن کو گفٹ کرنے کیلئے بنایا تھا مگر شادی پر آئے مہمان دولہا اور دلہن کو چھوڑ کر روبوٹ کے ساتھ سیلفیاں لیتے رہے ۔دولہے انجینئر کا کہنا تھا کہ وبوٹ مہمانوں کا استقبال کرنے سے بھی کہیں زیادہ کام کرتا ہے۔ دولہے کا کہنا تھا کہ یہ روبوٹ نہ صرف لوگوں کو خوش آمدید کہے گا بلکہ گھر کے کام کاج میں بھی میری بیگم کی مدد کیا کرے گا۔ ان کا کہنا تھا کہ گھر کے کام کاج کیلئے رکھے گئے نوکر عموماََ ملازمت چھوڑ کر بھاگ کھڑے ہوتے ہیںمگر یہ روبوٹ گھر کی صفائی ستھرائی کے ساتھ ساتھ سودا سلف لانے کا کام بھی کرے گا۔ شادی کے اس انوکھے اور منفرد تحفے پر دلہن نے خوشی کا اظہار کرتے ہوئے کہا کہ میرے خاوند نے روبوٹ تو بنا دیا ہے، میں اُمید کرتی ہوں کہ یہ روبوٹ گھر کے کاموں میں میری کچھ مدد کرے تاکہ مجھے اس کا فائدہ ہو۔
