اسلام آباد(مانیٹرنگ ڈیسک) اٹلی میں شادی کیوں کی، بھارتی ہندو انتہا پسند بھارتی کرکٹ کپتان کے پیچھے پڑ گئے، تفصیلات کے مطابق بھارتی کرکٹ ٹیم کے کپتان ویرات کوہلی کو بالی ووڈ اداکارہ انوشکا شرما کے ساتھ اٹلی
میں شادی کرنا مہنگا پڑ گیا ہے۔ بھارتی ویرات کوہلی کی شادی کو لے کر جذباتی ہوئے جا رہے ہیں اور ان کی شادی پر کئی سوالات اٹھا دئیے ہیں جبکہ ہندو انتہا پسند بھی ویرات کوہلی کو اچھی بھلی سنانے میں لگ گئے ہیں۔ بھارت کی حکمران ہندو انتہا پسندجماعت بھارتیہ جنتا پارٹی(بی جے پی) کی ریاست مدھیہ پردیش کے ایم ایل اے پنا لال سکھیانےتو کوہلی کو محب وطن قرار دینے سے ہی انکار کر دیا ہے۔ انہوں نے سکل انڈیا سینٹر کی افتتاحی تقریب کے دوران کوہلی کی دھجیاں اڑاتے ہوئے کہا کہ ویرات بھارت میں رہتے ہیں اور یہیں سے پیسے کماتے ہیں لیکن انہیں شادی کرنے کے لیے اپنے ملک میں کوئی جگہ نہیں ملی یہ ناقابل یقین ہے۔ پنالال کا مزید کہنا تھا کہ ہمارے دیوی دیوتاؤں نے یہاں شادی کی لہٰذا ویرات کوبھی یہیں شادی کرنی چاہئے تھی نہ کہ کسی اور ملک میں۔ کوہلی یہاں(بھارت)سے پیسےکماتے ہیں اور اپنی شادی کے لیے انہوں نے بھارت سے کمائے ہوئے لاکھوں روپے اٹلی میں خرچ کردئیے کیاوہ اپنے ملک کی عزت نہیں کرتے ان کی یہی بات ثابت کرتی ہے کہ وہ بالکل بھی محب وطن نہیں ہیں۔
