اسلام آباد(مانیٹرنگ ڈیسک)رانا ثنا اللہ کے حلقے میں نجی ٹی وی دنیا نیوز کے معروف اینکر و کالم نگار حبیب اکرم رانا ثنا اللہ کے استعفے سے متعلق لوگوں کی رائے جاننے کیلئے ایک سروے کرنے پہنچے تو اس وقت وہ شدید حیران ہوئے جب رانا ثنا اللہ کے حلقے کے عوام نے آئندہ الیکشن میں بھی منتخب کرنے کا اعلان کیا، حبیب اکرم نے لوگوں سے صرف ایک ہی سوال پوچھا کہ اس وقت

رانا ثنا اللہ پر استعفے کے حوالے سے شدید پریشر ہے کیا انہیں استعفیٰ دے دینا چاہئے اور ان کے متعلق آپ کی کیا رائے ہے۔ حیرت انگیز طور پر 100فیصدمیں سے صرف ایک فیصد نے رانا ثنا اللہ کے استعفیٰ کی مانگ کی جبکہ باقی 99فیصد رانا ثنا اللہ کے حق میں تھے ۔ حلقے کے عوام نے رانا ثنا اللہ کو آئندہ انتخابات میں بھی منتخب کرنے کا اعلان کیا۔ ایک شخص کا کہنا تھا کہ رانا ثنا اللہ کو پیر سیالوی کے سامنے پیش نہیں ہونا چاہئے اور نہ ہی استعفیٰ دینا چاہئے، لفظوں کے ہیر پھیر کرنے سے کوئی کافر نہیں ہو جاتا ۔ ایک اور شخص کا کہنا تھا کہ رانا ثنا اللہ نے جب ٹیلی ویژن پر آکر ببانگ دہل اعلان کیا ہے کہ وہ مسلمان ہیں اور رسول کریمؐ کی ختم نبوت پر یقین اور ایمان رکھتے ہیں تو پھر ان سے استعفیٰ کا مطالبہ کرنا صحیح نہیں۔ واضح رہے کہ حبیب اکرم نے سروےکے دوران رپورٹ میں کسی قسم کی ایڈیٹنگ سے گریز کا بھی بتایا ان کا کہنا تھا کہ وہ اس سروے کی ایڈیٹنگ نہیں کرینگے اور نہ ہی منتخب افراد سے سوال پوچھیں گے بلکہ راہ چلتے ہوئے وہ کسی بھی شخص سے سوالات کرینگے اور رپورٹ میں دیکھا جا سکتا ہے کہ حبیب اکرم نے راہ چلتے ہوئے مختلف افراد سے سوالات کئے۔ حبیب اکرم کا کہنا تھا کہ میڈیا پر رانا ثنا اللہ کے استعفیٰ سے متعلق بڑا شور مچا ہوا ہے جبکہ ان کے حلقے میں تو صورتحال ہی تبدیل نظر آتی ہے ۔ حلقہ کے عوام رانا ثنا اللہ کے حق میں اور ان کی محبت میں گرفتار ہیں۔

موضوعات:حبیب اکرم دنیا نیوز سروے رانا ثنا اللہ حلقہ