کراچی (این این آئی)سابق صدر اور جنرل (ر) پرویز مشرف نے سعودی عرب کے اتحادی ممالک اور قطر کے درمیان جاری کشیدگی میں پاکستانی حکومت کے کردار کو تنقید کا نشانہ بناتے ہوئے کہا ہے کہ وہ حیران ہیں کہ پاکستان قطر بحران سے کس طرح نمٹ رہا ہے؟۔غیر ملکی میڈیا کو دیئے گئے انٹرویو میں انہوں نے کہا کہ قطر کبھی پاکستان کے ساتھ نہیں تھا اور اس بات کا ہم نے کئی مرتبہ مشاہدہ کیا۔انہوں نے کہا کہ
سعودی عرب اور متحدہ عرب امارات ہمیشہ پاکستان کے بہترین دوست رہے ہیں، ہمیں کبھی بھی ان ملک کے خلاف کچھ نہیں کرنا چاہیے ٗیہ دونوں ممالک ہمیشہ ہمارے ساتھ کھڑے ہوئے ہیں اور ہمیں ان کی دوستی کی قدر کرنی چاہیے ٗقطر میں پاکستان کی حکمراں جماعت کے کاروباری مفادات کا حوالہ دیتے ہوئے انہوں نے کہاکہ ذاتی کاروباری مفاد کے لیے ملک کے وسیع تر مفاد کو نظر انداز کیا گیا ٗاگر یہی ترجیحات ہیں تو خدا ہمارے ملک کی حفاظت کرے۔انہوں نے کہا کہ میں نے مسئلہ کشمیر کی قرارداد پر ایک بڑے اقدام کیلئے کام شروع کردیا ہے ٗانہوں نے بتایا کہ وہ اور ان کے ذہن سے ہم آہنگی رکھنے والے دیگر لوگوں نے ایک گروپ تشکیل دیا ہے،جس میں پاکستان، بھارت اور دونوں اطراف کے کشمیر سے لوگ شامل ہیں ٗہم اقوام متحدہ اور پاکستانی اور بھارتی حکومت کے پاس جائیں گے۔انہوں نے کہاکہ مسئلہ کشمیر حل ہوسکتا ہے اور انہیں کامل یقین ہے کہ موجودہ بھارتی حکومت اس کو حل کرنے کے قابل ہے کیونکہ وہ سخت لوگوں کی نمائندگی کرتی ہے۔انہوں نے کہا کہ آج کی دنیا میں جغرافیائی اقتصادیات، جغرافیائی سیاست اور جغرافیائی حکمت عملی کا تعین کیا جارہا ہے، سی پیک نے ہمیں اپنی اسٹریٹجک مقام کو اپنی بہتری کے لیے استعمال کرنے کا بہترین موقع فراہم کیا ہے۔دریں اثناء نجی ٹی وی کو انٹرویو میں پرویزمشرف نے کہا کہ میں عمران خان کے ساتھ کھڑا ہونے کو تیار ہوں، سپریم کورٹ کو چاہئے کہ حکومت کو ہٹادے حکومت کو گھر بھیجنے کیلئے آئینی طریقہ نکالنا ہوگا۔
