اسلام آباد(مانیٹرنگ ڈیسک)ہندو انتہا پسند جماعت شری راجپوت کرنی سینا نے فلم ’’پدماوتی‘‘ریلیز کرنے پر دپیکا پڈوکون کی ناک کاٹ دینے کی دھمکی دیدی۔ تفصیلات کے مطابق بالی ووڈ میں ڈمپل گرل سے مشہور معروف
اداکارہ دپیکا پڈوکون کو انتہا پسند جماعت شری راجپوت کرنی سینا نے دھمکی دی ہے کہ اگر ان کی فلم ’’پدماوتی‘‘ریلیز کی گئی تو وہ دپیکا کی ناک کاٹ دیں گے۔ واضح رہے کہ فلم ’’پدماوتی‘‘کی کہانی چتوڑ کی رانی پدماوتی اور چودھویں صدی میں دہلی کے سلطان کے درمیان ہونے والی لڑائی کے گرد گھومتی ہے۔ ہندو انتہا پسندوں کا کہنا ہے کہ فلم میں رانی پدماوتی کے تاریخی کردار کو مسخ کیا گیا ہے۔ فلم اگلے ماہ یکم دسمبر کو نمائش کے لیے پیش کی جائے گی۔کرنی سینا کے سربراہ لوکیندرا سنگھ کالوی نے دپیکا کی ناک کاٹنے کے علاوہ فلم کے خلاف پورے ملک میں ریلیاں نکالنے کا بھی اعلان کیا ہے۔ اس کے علاوہ انہوں نے اداکارہ دپیکا پڈوکون کو ’’ناچنے والی‘‘ قراردیتے ہوئے الزام لگایا ہے کہ انڈرورلڈ مافیا نے بھارتی تاریخ مسمارکرنے کے لیے فلم میں پیسہ لگایا ہے۔ہندو انتہا پسندوں کی جانب سے ملنے والی دھمکیوں کے پیش نظرمہاراشٹرا کی ریاستی حکومت نے سنجے لیلا بھنسالی کو سیکیورٹی فراہم کی ہے جب کہ راجھستان کی چیف وومن کمیشن ثمن شرما اور سی بی ایف سی کے چیف پرسون جوشی نے اس بات کی یقین دہانی کرائی ہے کہ فلم کی ریلیز کے وقت کسی قسم کا حملہ نہیں کیا جائےگاجبکہ فلم بینوں کو مکمل تحفظ فراہم کیا جائے گا۔
