راولپنڈی (این این آئی) چیف آف آرمی سٹاف جنرل قمر جاوید باجوہ نے کہا ہے کہ پاکستان کے دفاع کیلئے تمام ریاستی اداروں کو ملکی مفاد میں کام کرنا ہوگا۔ ہمیں ترقی کیلئے صرف اور صرف پختہ عزم اور بطور قوم متحد رہنے کی ضرورت ہے۔منگل کو آئی ایس پی آر سے جاری بیان کے مطابق آرمی چیف جنرل قمر جاوید باجوہ نے اسٹرائیک کور منگلا کا دورہ کیا جہاں انہوں نے تربیتی مشقوں کا معائنہ کیا اور جوانوں کے حوصلے اور تربیت کے معیار کو سراہا۔اس موقع پر افسروں اور جوانوں سے خطاب کرتے ہوئے

آرمی چیف نے کہا کہ قائداعظمؒ نے کہا تھا کہ دنیا کی کوئی طاقت پاکستان کو ختم نہیں کرسکتی، ہمیں چیلنجز کے مقابلہ کیلئے لمبا سفر طے کرنا ہے، انشاء اللہ پاکستان جلد اقوام عالم کی صف اول میں شامل ہوگا۔انہوں نے کہا کہ ہم اعلیٰ معیار کی تربیت اور آپریشنل تیاریوں سے غافل نہیں رہ سکتے، ہم نے طویل سفر کے بعد چیلنجز پر قابو پالیا ہے، انہوں نے کہاکہ ہمیں ترقی کیلئے صرف اور صرف پختہ عزم اور بطور قوم متحد رہنے کی ضرورت ہے۔ انہوں نے کہا کہ دفاع پاکستان کیلئے تمام ریاستی اداروں کو ملکی مفاد میں کام کرنا ہوگا۔