نئی دہلی (اے این این)بھارتی کرکٹ میں بڑا سکینڈل سامنے آ گیا، کیوریٹر اب بکیز کی مرضی کی پچیں تیار کرنے لگے۔بھارت اور نیوزی لینڈ کے درمیان دوسرا ون ڈے پونے میں کھیلا جانا ہے،میچ سے قبل بھارتی ٹی وی چینل کے اسٹنگ آپریشن کے دوران کیورٹر پندورنگ سیلوگونکار کیمرے کے سامنے پچ کی معلومات فراہم کرتے پکڑے گئے

کہ پونے کی پچ بکیز کی ڈیمانڈ کے مطابق بنائی جائے گی ۔بھارتی کرکٹ بورڈ اور آئی سی سی کے رولز کے مطابق کوئی بھی اسٹیڈیم کے اندرآکر پچ کا معائنہ نہیں کرسکتا ہے لیکن پچ کیورٹر نے بکیز یعنی رپورٹر کو پچ کے متعلق معلومات فراہم کی ۔جب رپورٹرز نے کہا کہ انہیں بولرز کے لئے باونس چاہیے کیا وہ ملے گا،کیورٹر نے کہا کہ کام ہوجائیگا،جبکہ پچ پر 350 سے زائد رنز بنیں گے اور سیکنڈ اننگز کھیلنے والی ٹیم باآسانی ٹارگٹ چیز کرلے گی کیوں کہ یہ پچ بیٹنگ پیراڈائز ہوگی۔انٹرنیشنل کرکٹ کونسل(آئی سی سی) نے کہا ہے کہ کیوریٹر پندورنگ سیلو گونکار کو معطل کرکے ان کی جگہ رمیش مہا منوکر کو پچ کیورٹر مقرر کیا گیا ہے۔