لاہور( این این آئی)وفاقی وزیر برائے بین الصوبائی رابطہ ریاض حسین پیرزادہ نے کہا ہے کہ ہو سکتا ہے ’’ٹیک اوور ‘‘کے الفاظ کا چنائو درست نہ ہو لیکن پارٹی کے بہترین مفاد میں جو باتیں کی ہیںان پر قائم ہوں ، شہباز شریف اپنے بڑے بھائی کے انتہائی تابعدار ہیں وہ انہیں کبھی نہیں چھوڑیں گے اس لئے موجودہ حالات میں پارٹی کی قیادت انہیں سونپنے کی تجویز دی ۔ ایک انٹرویو میں ریاض حسین پیرزادہ نے کہا کہ

مسلم لیگ (ن)ملک کی بڑی سیاسی جماعت ہے اسے نواز شریف اور نہ ہی شہباز شریف کی اولاد چلا سکتی ہے ۔ انہوں نے کہا کہ جو لوگ میری بات پر واویلا کر رہے ہیں انہیں بھی علم ہے کہ میں کیا کہہ رہا ہوں لیکن وہ دانستہ طور پر اسے سمجھنا اور نہ آگے سمجھانا چاہتے ہیں۔ انہوں نے کہا کہ ہم دیہاتی لوگ ہیں اور صاف بات کرتے ہیں، میں نے جو باتیں کی ہیں ان پر قائم ہوں اور ان کی تردید نہیں کر رہا ۔