اسلام آباد(مانیٹرنگ ڈیسک)دبئی میں پاکستانی کرکٹ ٹیم کے کھلاڑی کے ساتھ بکیز کا رابطہ، بڑی پیشکش ، کھلاڑی نے ٹیم مینجمنٹ کو بکیز کے رابطوں سے متعلق آگاہ کردیا، خواب خرگوش کے مزے لیتی ٹیم مینجمنٹ کی دوڑیں لگ گئیں، سخت انتظامات کے باوجود کھلاڑیوں سے غیر متعلقہ افراد کی ملاقاتوں کا سلسلہ جاری۔ نجی ٹی وی ایکسپریس نیوز کی ایک رپورٹ کے مطابق
دبئی میں پاکستانی کرکٹ ٹیم کے نہایت اہم کھلاڑی کے ساتھ بکیز نے رابطہ کر کے اسے بڑی پیشکش کی ہے جس پر اس کھلاڑی نے بکیز کے رابطوں سے متعلق ٹیم مینجمنٹ کو آگاہ کر دیا ہے ۔ واضح رہے کہ ایک دن قبل اس حوالے سے خبریں میڈیا کی زینت بن چکی ہیں ہیں کہ پاکستانی کرکٹ ٹیم کے کھلاڑی نے بکیز کے رابطہ کرنے کی اطلاع ٹیم مینجمنٹ کو دی ہے جس پر ٹیم مینجمنٹ نے سخت انتظامات کرتے ہوئے کھلاڑیوں کو ہدایات جاری کر دی ہیںجبکہ اطلاع دینے والے کھلاڑی کا نام صیغہ راز میں رکھا جا رہا ہے جو کہ پالیسی کا حصہ ہے۔ دوسری جانب نجی ٹی وی ایکسپریس کی رپورٹ میں دعویٰ کیا گیا ہے کہ بکیز نے جس کھلاڑی سے رابطہ کیا تھا وہ کپتان سرفراز احمد تھے جنہوں نے اس سے متعلق ٹیم مینجمنٹ کو آگاہ کر دیا ہے۔ رپورٹ کے مطابق بظاہر تو اس اطلاع کے ملنے کے بعد انتظامات سخت کر دئیے گئے ہیں مگر نئے ہوٹل میں بھی کھلاڑیوں سے مہمان ملاقات کرنے کیلیے آتے ہیں۔ وہ بغیر کسی روک ٹوک ان سے ملاقات کرتے اور دوستوں کے ساتھ باہر گھومنے بھی جاتے ہیں، ٹیم منیجر طلعت علی زیادہ سخت منتظم نہیں، گزشتہ دنوں ان کا بیٹا بھی انگلینڈ سے آیا ہوا تھا اور وہ فارغ وقت اسی کے ساتھ گذارتے تھے۔ذرائع نے مزید بتایا کہ بورڈ حکام نے ماضی کی غلطیوں سے کوئی سبق نہیں سیکھا، حالات اگر ایسے ہی
برقرار رہے تو مستقبل میں کوئی اور اسکینڈل بھی سامنے آ سکتا ہے۔ واضح رہے کہ رواں برس دبئی میں ہی پی ایس ایل کے دوران اسپاٹ فکسنگ اسکینڈل سامنے آیا تھا جس میں شرجیل خان اور خالد لطیف سمیت کئی کرکٹرز ملوث نکلے، معاملے کی تحقیقات تاحال جاری ہیں، پی سی بی نے مسئلے کا حل ہوٹل کی تبدیلی سے نکالا، سری لنکا سے حالیہ سیریز میں قومی ٹیم دوسرے ہوٹل میں قیام پذیر ہے۔
