لاہور( این این آئی)تحریک انصاف کے مرکزی رہنماؤں نے قیادت کو آئندہ عام انتخابات کے لئے امیدواروں کے ناموں کو حتمی شکل دینے کی تجویز دیدی ۔تفصیلات کے مطابق تحریک انصاف کی قیادت نے رہنماؤں اور کارکنوں کو آئندہ عام انتخابات کی تیاریوں کا حکم تو دے دیا ہے لیکن امیدواروں کے نام فائنل نہ کرنے سے تحریک انصاف کے حلقوں میں بے چینی کی کیفیت پائی جارہی ہے۔پارٹی کے مرکزی رہنماؤں نے
عمران خان کو تجویز دی ہے کہ انتخابی امیدواروں کے نام فائنل کردیں کیونکہ اگر انتخابات سے دو ماہ پہلے نام فائنل کیے گئے تو پارٹی کے اندر محاذ آرائی میں اضافہ ہوگا۔انتخابات کے قریب جاکر نام فائنل کرنے سے بہت سے لوگ ناراض بھی ہوں گے ، اگر اب نام فائنل کردیئے جاتے ہیں تو جہاں پارٹی کو اچھی تیاری کا موقع ملے گا وہیں جو لوگ ناراض ہوں گے انہیں منانا بھی آسان ہوگا۔ رہنماوں کا مشورہ ہے کہ انتخابی امیدواروں کے نام فائنل کرکے انہیں حلقے میں کام کرنے دیا جائے۔پارٹی رہنماؤں نے اس بات کا بھی مطالبہ کیا ہے کہ قومی اسمبلی کے حلقوں کے امیدواروں کو صوبائی اسمبلی کی نشست کے امیدواروں کو نام دینے کے اختیارات بھی دئیے جائیں۔ذرائع کے مطابق عمران خان نے اس تجویز کے سامنے آنے کے بعد مشاورت کا عمل شروع کر دیا ہے۔
