ملتان(آئی این پی)پاکستان سپرلیگ کی نئی ٹیم ملتان سلطان نے ابتدائی 9کھلاڑیوں کے نام جاری کردئیے جبکہ ملتان سلطان نے کرکٹرشعیب ملک کو کپتان بنانے کا فیصلہ بھی کر لیا ہے۔تفصیلات کے مطابق پی ایس ایل کے تیسرے سیزن کی آمدسے قبل نئی ٹیم ملتان سلطان نے ابتدائی 9کھلاڑیوں کے نام جاری کردئیے ہیں،آئی این پی کے مطابق ملتان سلطان کی ٹیم کے ابتدائی کھلاڑیوں میں شعیب ملک،کیرون پولارڈ، سنگا کارا،سہیل تنویر،محمد عرفان،کاشف بھٹی،صہیب مقصود،جنید خان اورعرفان خان شامل ہیں۔
دوسری جانب ملتان سلطان نے نامورکرکٹرشعیب ملک کو کپتان بنانے کا فیصلہ بھی کرلیا ہے ،شعیب ملک نے پاکستان کرکٹ ٹیم کی ون ڈے اور ٹی 20 میں قیادت کے فرائض سرانجام دیے ہیں لیکن اب قومی ٹیم میں ایک کھلاڑی کی حیثیت سے کھیل رہے ہیں ۔واضح رہے کہ پاکستان سپر لیگ میں ملتان سلطان کی شمولیت کے ساتھ ہی اس سال چھ ٹیمیں ایونٹ میں شرکت کریں گی اور اسی سلسلے میں ملتان کو دس اکتوبر سے قبل اپنی ٹیم کے دس کھلاڑیوں کو سائن کرنا ہے جبکہ بقیہ کھلاڑیوں کا انتخاب ڈرافٹ کے ذریعے کیا جائے گا۔