لاہور (نیوزڈیسک) قومی اسمبلی کے حلقہ این اے 122 کی نادرا کی پری سکیننگ رپورٹ الیکشن ٹربیونل میں جمع کرا دی گئی۔ رپورٹ 106صفحات پر مشتمل ہے ، رپورٹ کی کاپی دنیا نیوز نے حاصل کرلی۔ الیکشن کمیشن میں جمع کرائی گئی رپورٹ ایک سوچھ صفحات پر مشتمل ہے۔ الیکشن ٹربیونل نے دو سو 84 پولنگ سٹیشوں کا ریکارڈ نادرا کو بھجوایا تھا ، نادرا نے دو سو 84 پولنگ سٹیشنز کی پری سکیننگ مکمل کرلی ہے۔ این اے 122 کی پری سکیننگ 19مارچ سے 3اپریل تک کی گئی۔ ذرائع کے مطابق تمام کارروائی نادرا کے ا?فیسرز اور لوکل کمیشن کے سامنے کی گئی۔ رپورٹ میں کہا گیا ہے کہ پولنگ سٹیشن 1 کے لفافے پھٹے ہوئے تھے جبکہ پولنگ سٹیشن نمبر 1 کے تھیلے سے بعض انتخابی ریکارڈ بھی نہیں ملا۔ عمران خان کے وکیل نے میڈیا سے گفتگو میں کہا کہ این اے 122 کی پری سکیننگ سے یہ ثابت ہوا متعدد پولنگ سٹیشنوں میں انتخابی ریکارڈ موجود نہیں درجنوں پولنگ سٹیشنوں کے تھیلوں میں فارم 15اور14بھی موجود نہیں جبکہ سردار ایاز صادق کے وکیل نے کہا کہ ابھی کچھ بھی کہنا قبل از وقت ہے۔ اصل حقائق مکمل سکیننگ رپورٹ سامنے آنے پر ظاہر ہوں گے۔