لاہور/اسلام آباد(این این آئی) قومی کرکٹ ٹیم کے سابق کپتان وقار یونس کو اسلام آباد یونائیٹڈ کے باؤلنگ کوچ مقرر کر دیا گیا ۔ بتایا گیا ہے کہ سابق ہیڈ کوچ وقار یونس کو باؤلنگ کوچ مقرر ہونے پر اسلام یونائیٹڈ کے صدر علی نقوی نے کیپ پہنائی اور شرٹ دی ۔ اس موقع پر میڈیا سے گفتگو کرتے ہوئے وقاریونس نے کہاکہ ایک اچھی ٹیم بنانے کیلئے کام کروں گا اور نیاٹیلنٹ پورے ملک سے اکٹھا کیا جائے گا ۔
انہوں نے کہاکہ سپاٹ فکسنگ روکنے کیلئے میرا کافی تجربہ ہے اور اس حوالے سے کھلاڑیوں کو لیکچر بھی دوں گا اور ان پر نظر بھی رکھوں گا ۔ اس موقع پر مصباح الحق نے کہاکہ وقار یونس کو ٹیم میں ویلکم کرتا ہوں اور اتنے بڑے نام کا کھلاڑیوں کوبہت فائدہ ہوگا ۔انہوں نے اپنے حوالے سے بات کرتے ہوئے کہاکہ ہر سال اندازہ کروں گا کے کتنا کھیل سکتا ہوں اور جب تک فٹ ہو ں کھیلتا رہوں گا ۔
