اسلام آباد(آئی این پی)قومی ایئرلائن نے مالی بحران کے باعث منافع بخش روٹس بینکوں کو گروی رکھوانا شروع کردیئے ہیں اور غیر ملکی بینک سے 15 ارب روپے کا قرضہ حاصل کرلیاہے۔تفصیلات کے مطابق پی آئی اے کا مالی بحران شدت اختیار کرگیا ہے، جس کے باعث ایئر لائن کو فضائی آپریشن چلانے میں بھی دشواریوں کا سامنا ہے، پی آئی اے نے فضائی روٹس گروی رکھوا کر15ارب روپے قرض لیا، قرضہ غیر ملکی بینک سے حاصل کیا گیا۔
ذرائع نے بتایا کہ قرضے کی رقم جلد قومی ایئر لائن کے اکاؤنٹس میں منتقلی کا امکان ہے، قرضے کی سیکورٹی کے لئے سعودی عرب کے منافع بخش روٹس کنسورشیم کے حوالے کردیا گیا ہے۔روٹس تین سال تک اسٹینڈرڈ بینک کی سربراہی میں کنسورشیم کے پاس رہیں گے۔قومی ایئر لائن کی سعودی عرب کے تمام روٹس پرحاصل ہونے والی آمدنی بینکوں کو ادا کی جائے گی۔ذرائع کے مطابق قرضے کی رقم ملازمین کی تنخواہوں،فیول کمپنیوں ودیگر واجبات، طیاروں کی منٹینس اور پرزوں کی خریداری پر صرف کی جائے گی۔ وزیر اعظم کے مشیر ہوا بازی سردار مہتاب احمد خان نے کہا ہے کہ پی آئی اے ملازمین کی تنخواہیں24گھنٹوں کے اندر ادا کر دی جائیں گی، ادارے کو اپنے پاؤں پر کھڑا کرنے کے لئے کوشاں ہیں،ملازمین بھی تنخواہیں لینے کا حق ادا کریں اور تنخواہیں جنریٹ کریں۔تفصیلات کے مطابق پاکستان انٹرنیشنل ایئرلائن (پی آئی اے)کا خسارہ دن بدن بڑھتا جا رہا ہے۔ ذرائع کے مطابق پی آئی اے نے گزشتہ دو ماہ سے ملازمین کو تنخواہوں کی ادائیگی نہیں کی۔ ذرائع کے مطابق پی آئی اے نے عید الاضحی کے موقع پر وزارت خزانہ سے سپیشل گرانٹ کیلئے بھی درخواست دی تھی مگر وزارت خزانہ نے پی آئی اے کو مزید امداد دینے سے انکار کر دیا تھا۔
پی آئی اے ملازمین کو تنخواہ نہ ملنے کے معاملے پر مشیر ہوا بازی سردار مہتاب احمد خان سے رابطہ کیا گیا تو انہوں نے کہا کہ دو ماہ کی تنخواہیں نہ ملنے کی باتیں درست نہیں ایک ماہ کی تنخواہ واجب الادا تھی جس کے لئے انتظام کرلیا گیا ہے اور وہ جلد ادا کر دی جائے گی انہوں نے کہا کہ ہم پی آئی اے کو مشکلات سے نکالنے کے لئے ہر ممکن کوششیں کر رہے ہیں ۔ انہوں نے کہا کہ پی آئی اے کو بھی چاہیے کہ وہ اپنی آمدنی میں اضافہ کرے اور وسائل پیدا کرے تاکہ ملازمین کی تنخواہوں سمیت دیگر ضرورتیں پوری کی جا سکیں
کیونکہ ادارے میں کمائی ہو گی تبھی ادارے کی تمام ضروریات پوری کی جا سکیں گی ۔ سردار مہتاب نے کہا کہ جب سے میں آیا ہوں ادارے کی بہتری کے لئے کوششیں کر رہا ہوں ۔ اس دوران جہازوں کی حالت ٹھیک کی گئی اور باقی بھی معاملات میں کافی پیش رفت ہوئی ۔ انہوں نے کہا کہ پی آئی اے کے نئے چیف ایگزیکٹو نے وزارت خزانہ سے پی آئی اے کے بحران کے حل کے حوالے سے رابطہ کیا تھا تو وزارت خزانہ نے فنڈز دینے سے انکار کر دیا کہ ادارہ اپنے وسائل پیدا کرے اور آمدن میں اضافہ کرے ۔ انہوں نے کہا کہ اس کے بعد سے ہم نے پوری کوشش کی ہے کہ ادارے کو اپنی آمدن اور وسائل کے تحت اپنے پاؤں پر کھڑا کیا جائے اور بحران پر قابو پایا
