اسلام آباد (آئی این پی)چیئرمین سینیٹ میاں رضا ربانی کی طرف سے رواں ہفتے آئینی اداروں بشمول عسکری اداروں کے ساتھ مکالمہ شروع کرنے کے معاملہ پر ایوان بالا کی چیدہ چیدہ جماعتوں سے مشاورت متوقع ہے ۔ ذرائع کا دعویٰ ہے کہ اہم سیاسی حلقوں کی طرف سے میاں رضا ربانی کو اس ضمن میں بھرپور تعاون کی یقین دہانی کروا دی گئی ہے ۔

چیئرمین سینیٹ یہ مکالمہ پارلیمنٹ ،عدلیہ اور ملٹری اسٹیبلشمنٹ کے درمیان کروانا چاہتے ہیں تاکہ اداروں میں ہم آہنگی کو مزید فروغ ملے اور خارجہ ،داخلہ ودفاع کی پارلیمنٹ سے وضع پالیسیوں پر موثر انداز میں عمل درآمد ہوسکے ۔ ذرائع کا دعویٰ ہے کہ اس مکالمے کیلئے رواں ہفتے پیش رفت کا امکان ہے ۔