سیالکوٹ(آئی این پی)بھارتی آبی جارحیت کے باعث مرالہ میں پانی کی سطح 30ہزار کیوسک تک گرگئی، نہر مرالہ راوی لنک کو پانی کی فراہمی 14ہزار کیوسک کم کردی گئی ۔ تفصیلات کے مطابق بھارت کی طرف سے ہماچل پردیش میں آبی ذخیروں کو دریائے چناب میں داخل ہونے سے روک کراندورن ہندوستان کی طرف موڑنے کی بناء پر ہیڈ مرالہ کے مقام پر دریائے چناب ،دریائے جموں توی، دریائے مناورتوی میں پانی کی آمد 30265کیوسک تک گر گئی ہے اور ہیڈ خانکی کیلئے اخراج 8000کیوسک کردیا گیاہے۔

ہیڈ مرالہ اتھارٹی کے مطابق دریائے چناب میں پانی کی آمد 25751، دریائے جموں توی میں 3407، دریائے مناورتوی میں 1107 کیوسک آمد ریکارڈ کی جارہی ہے۔ جبکہ نہر اپر چناب کو 18ہزار کیوسک سے کم کرکے 13800کیوسک پانی فراہم کیا جارہاہے۔ دونوں نہروں میں پانی کی فراہمی کم کرنے کا مقصد ہیڈ خانکی کو نہر ایل سی سی رواں رکھنے کیلئے ہر صورت 8000کیوسک پانی فراہم کرنا ہے۔