لندن(این این آئی) برطانوی ڈاکٹروں نے سابق وزیر اعظم محمد نواز شریف کی اہلیہ بیگم کلثوم نواز کی ایک اور سرجری کا فیصلہ کیا ہے۔ میڈیا رپورٹ کے مطابق گزشتہ دنوں بیگم کلثوم نواز کی لندن میں دوران علاج کینسر کی تشخیص ہوئی تھی جس کے بعد ان کا علاج لندن کے مقامی ہسپتال میں جاری ہے جبکہ عید سے قبل انہیں ہسپتال سے گھر منتقل کردیا گیا تھا۔
بیگم کلثوم نواز کے معالجین نے حلق کے کینسر کی ایک اور سرجری کا فیصلہ کیا ہے۔بیگم کلثوم نواز ہفتہ کی صبح نوازشریف اور بیٹوں کے ہمراہ ہسپتال پہنچیں جہاں انہیں ایک بار پھر ہسپتال میں داخل کرلیا گیا ۔بیگم کلثوم نواز 11 روز میں وہ دوسری بار ہسپتال میں داخل ہوئی ہیں۔سابق وزیراعظم نواز شریف اہلیہ کے ہمراہ ہسپتال میں رہیں گے۔ دوسری جانب سابق نااہل وزیراعظم نواز شریف کی اہلیہ جو کینسر کے علاج کیلئے بیرون ملک مقیم ہیں کی فیملی کے قریبی ذرائع نے یہ انکشاف کیا ہے کہ کلثوم نواز کی صحت میں تیزی سے بہتری آ رہی ہے اور شاید اسی خوشی میں انہوں نے لندن کے ایک کیفے میں کھانا بھی تناول کیا۔ شریف فیملی کے خاندانی ذرائع نے بتایا کہ گلے کے کینسر کے کامیاب آپریشن کے بعد کلثوم نواز کی صحت دن بدن بہتر ہوتی جا رہی ہے جو تمام اہل خانہ کیلئے خوشی کا باعث ہے۔ خاندانی ذرائع کے مطابق بیگم کلثوم نواز نے لندن کے ایک ہوٹل میں اپنے بچوں کے ہمراہ کھانا کھایا جس کے بعد یہ توقع کی جا رہی ہے کہ وہ جلد از جلد پاکستان آ کر انتخابی تیاریوں میں بھرپور حصہ لیں گی۔
