اسلام آباد ( نیوزڈیسک ) تحریک انصاف کے چئیرمین عمران خان کا کہنا ہے کہ ایم کیو ایم کے کارکنان اشتعال انگیزی کے ذریعے ضمنی الیکشن رکوانے کی ناکام کوشش کر رہے ہیں ، ایم کیو ایم صرف فاشسٹ طریقوں سے ہی جیت سکتی ہے۔ تحریک انصاف کے سربراہ عمران خان نے ٹویٹر پیغام میں کہا ہے کہ ایم کیو ایم کی غیر جمہوری سوچ بے نقاب ہوگئی ہے اور متحدہ نے ہمیں پہلے سے زیادہ پر عزم کر دیا ہے۔ عمران خان کا کہنا ہے کہ الطاف حسین کے فاشسٹ اقدامات اور تشدد کا معاملہ برطانوی حکومت کے سامنے اٹھائیں گے۔ ایم کیو ایم صرف فاشسٹ طریقوں سے ہی جیت سکتی ہے۔ اس سے قبل عمران خان نے کراچی میں پی ٹی ائی کی مقامی قیادت سے ٹیلیفونک رابطہ کیا اور پی ٹی ائی کے کیمپ اکھاڑنے کی شدید مذمت کی۔ انہوں نے کہا کہ قانون نافذ کرنے والے اس صورتحال کا فوری نوٹس لیں۔ عمران خان کا کہنا تھا کہ سندھ پولیس پی ٹی ائی کارکنان کے تحفظ میں بری طرح ناکام ہوچکی ہے۔ عمران خان نے واقعہ کے ذمہ دار افراد کی گرفتاری کا مطالبہ کیا اور کہا کہ اپنے ہی گورنر کے سامنے بنائے گئے ضابطہ اخلاق کی ایم کیو ایم نے کھلم کھلا خلاف ورزی کی ہے۔ تحریک انصاف کے کارکنان ایسی بھونڈی حرکتوں سے گھبرانے والے نہیں۔