فیصل آباد (مانیٹرنگ ڈیسک)چنیوٹ میں تبلیغی جماعت کا قاتلانہ حملے میں زخمی ہونے والا دوسرا کارکن بھی دم توڑ گیا۔ واقعہ میں جاں بحق ہونے والوں کی تعداد دو ہو گئی۔ تفصیلات کے مطابق چنیوٹ کے موضع عاصیاں میں تبلیغی جماعت کی طرف سے ایک جماعت کی تشکیل کی گئی تھی جس میں کراچی سے تعلق رکھنے والے افراد بھی شامل تھے۔ واقعہ سے ایک دن قبل ایک مقامی شخص اکرام نے تبلیغی جماعت کے افراد سے دینی مسئلے پر بحث کی ۔ بحث کے دوران اکرام شدید مشتعل نظر آیا تاہم اس وقت وہ

گھر چلا گیا مگر رات کے وقت اس نے کلہاڑی سے مسجد میں سوئے ہوئے تبلیغی جماعت کے ارکان پر حملہ کر دیا جس سے ولی الرحمان نامی شخص موقع پر ہی کلہاڑی کے واروں سےزندگی کی بازی ہار گیا جبکہ عبداللہ نامی شخص کو شدید زخمی حالت میں ہسپتال منتقل کر دیا گیا جہاں آج وہ تین دن موت و حیات کی کشمکش میں رہنے کے بعد بالآخر دم توڑ گیا ہے۔یوں قاتلانہ حملے میں جاں بحق ہونےوالے تبلیغی جماعت کے ارکان کی تعداد 2ہو گئی ہے۔واضح رہے کہ پولیس نے مقدمہ درج کر کے ملزم کو گرفتار کر لیا ہے۔