یمن (نیوزڈیسک)یمن میں پھنسے پاکستانیوں کی بحفاظت واپسی کے اقدامات جاری ہیں۔ پاک بحریہ کا جہاز الشھر سے ایک سو چھیاسٹھ پاکستانیوں کو لائے گا ، تمام افراد کی امیگریشن کا عمل مکمل کرلیا گیا۔ دوسرا بحری جہاز کل حدیدہ پہنچے گا۔ جنگ زدہ یمن میں پھنسے پاکستانیوں کو نکالنے کے لیے کوششیں جاری ہیں اور یمن میں محصور رہ جانے والے باقی تمام پاکستانیوں کو وطن واپس لانے کے اقدامات کر لیے گئے ہیں۔ پاکستانی شہری مکلا میں اکٹھے ہوئے تھے جہاں سے انہیں وطن واپس لایا جانا تھا۔ تاہم مکلا بندرگاہ ابھی تک القاعدہ کے قبضے میں ہے جس کے باعث وہاں سے انخلا نہیں ہوسکا جس کے بعد پاکستانیوں کا قافلہ مکلا سے الشھر پہنچا جہاں سے وہ رجسٹریشن کے بعد بحری جہاز پر سوار ہوں گے اور اب پاکستانی مکلہ کے بجائے الشھر سے بحری جہاز پر سوار ہوں گے جو انہیں وطن واپس لائے گا۔ دوسری طرف پاک بحریہ کا دوسرا جہاز پانچ اپریل کو حدیدہ پہنچے گا جس میں صنعاء4 اور دیگر علاقوں میں پھنسے پاکستانیوں کو وطن واپس لایا جائے گا۔ بحری جہاز حدیدہ سے عدن جائے گا اور پھر وہاں سے پاکستان پہنچے گا اور اس طرح تمام محصورین کا یمن سے انخلا مکمل ہو جائے گا۔