اسلام آباد/نئی دہلی (آئی این پی ) پاکستانی اور بھارتی قومی ترانوں کی ویڈیو سوشل میڈیا پر وائرل،امن کا ترانہ کے عنوان سے اس گانے میں پاکستان اوربھارتی گلوکاروں نے حصہ لیا ، گانے میں ان دونوں ملکوں کے قومی ترانے کو ایک دوسرے کے ساتھ ملا کر گایا گیا ہے،بھارتی گلوکاروں کے گروپ واکس کورڈ نے پاکستانی ترانہ بغیر کسی دھن کے گایا اور کہا کہ یہ ترانہ ایمان، فخر، طاقت اور ترقی کے بارے میں ہے،ویڈیو کو فیس بک پر
468000 مرتبہ دیکھا گیا۔فیس بک پر امن پسند گروپ وائس آف رام نے اسے جاری کیا ہے اور سوشل میڈیا پر کئی لوگوں نے اس کاوش کی تعریف کی ہے۔گانے کی ویڈیو کا آغاز ان الفاظ سے ہوتا ہے: جب ہم اپنے سرحدیں فن کے لیے کھول دیتے ہیں تو امن خود بخود آجاتا ہے۔اس کے بعد کئی گلوکاروں نے سٹوڈیو اور مختلف جگہوں پر انڈیا کا قومی ترانہ گانا جانا ماتا اور پاکستانی ترانہ پاک سرزمین گایا۔اس گانے کی ویڈیو ان الفاظ پر اختتام پذیر ہوئی امن کے لیے ساتھ کھڑے ہوں۔چند روز قبل 11 اگست کو وائس آف رام نے ایک اور ویڈیو جاری کی تھی جس میں بھارتی گلوکاروں کے گروپ واکس کورڈ نے پاکستانی ترانہ بغیر کسی دھن کے گایا اور اس کے بارے میں کہا کہ یہ ترانہ ایمان، فخر، طاقت اور ترقی کے بارے میں ہے۔ اس ویڈیو کو فیس بک پر 468000 مرتبہ دیکھا گیا۔وائس آف رام کے سربراہ، فلم ساز رام سبرامنیان نے انڈین ویب سائٹ کیچ نیوز کو بتایا کہ انھوں نے یہ ویڈیوز اس لیے بنائیں کیونکہ بہت سے لوگ امن کے بارے میں بات کرنے سے خوفزدہ ہیں اور یہ یہ ناقابل فہم ڈر ہے۔انھوں نے مزید کہا میرے لیے یہ ویڈیوز ایک نئی شروعات کی مانند ہیں اور امن کی جانب ایک چھوٹا سے قدم ہے۔فیس بک پر ایک انڈین صارف کلپیش پٹیل نے وائس آف رام کی ویڈیو پر لکھا: میں امید کرتا ہوں کے یہ پاکستان میں وائرل ہو جائے۔ انڈیا میں بہت سے لوگ ہیں جو امن چاہتے ہیں
اور یہ جشن آزادی کا بہترین تحفہ ہے۔پاکستان میں کراچی سے اساما فاروقی نے جواب میں لکھا یہ پاکستان میں وائرل ہو گیا ہے۔ یہ بہت ہی خوبصورت ہے اور اسے سنتے ہوئے سکون کا احساس ہوتا ہے۔ پاکستان کی جانب سے بہت سا پیار۔
