واشنگٹن (این این آئی)امریکی انتظامیہ اس بارے میں غور کر رہی ہے کہ آیا اسے چین سے امریکہ آنے والے تجارتی سامان پر محصولات یا تجارتی پابندیاں عائد کرنی چاہیں۔میڈیارپورٹس کے مطابق امریکی میڈیا نے کہا ہے کہ صدر ڈونلڈ ٹرمپ امریکی تجارتی نمائندے رابرٹ لائٹ ہائزر کو یہ ہدایت دیں گے کہ وہ امریکی قانون کے 1974 کے ٹریڈ ایکٹ کے تحت چین کے تجارتی طریقہ کار کی تحقیقات کریں۔اس قانون کا مقصد امریکی صنعتوں کو

بیرونی ملکوں کے غیر منصفانہ تجارتی طور طریقوں سے تحفظ فراہم کرنا ہے۔انتظامی عہدے داروں کا کہنا تھا کہ اس سلسلے میں ایک باضابطہ اعلان آئندہ چند دنوں میں کیا جا سکتا ہے۔صدر ٹرمپ اور ان کی اقتصادی ٹیم کے ارکان ایک عرصے سے چین پر یہ الزام لگاتے آئے ہیں کہ وہ بڑے پیمانے پر تجارت میں، فولاد کی درآمد سے لے کر متاع دانش کی چوری جیسے طریقے استعمال کر رہا ہے جس سے امریکی کاروباروں کو نقصان پہنچ چکا ہے ۔