اسلام آباد(نیوزڈیسک)وزارت خزانہ نے آئندہ ماہ کے لئے پیٹرولیم مصنوعات کی قیمتوں میں اضافے کے لئے سمری وزیر اعظم نواز شریف کو ارسال کردی۔اسلام آباد میں وفاقی وزیر خزانہ اسحاق ڈار کی زیر صدارت اجلاس ہوا جس میں اوگرا کی جانب سے پیٹرولیم مصنوعات کی قیمتوں میں اضافے کی سمری کا جائزہ لیا گیا، سمری میں پیٹرول کی قیمت 4 روپے اضافے کے ساتھ 70.29 روپے سے بڑھا کر 74.29 روپے، ہائی اسپیڈ ڈیزل کی قیمت 6.25 روپے اضافے کے ساتھ 80.61 روپے سے بڑھا کر86.86 روپے، لائٹ ڈیزل آئل کی قیمت 2.54 روپے اضافے سے 57.94 روپے سے بڑھا کر 60.08 روپے جب کہ ایچ او بی سی 7.66 روپے اضافے کے ساتھ 80.18 روپے سے بڑھا کر 87.84 روپے فی لیٹر کرنے کی تجویز دی گئی ہے۔اجلاس نے سمری پر غور کے بعد وزیر اعظم نواز شریف کو بھجوادی ہے جو پیٹرولیم مصنوعات کی تجویز کردہ اضافے کی حتمی منظوری دیں گے۔