راولپنڈی(آئی این پی )بھارتی فوج کی لائن آف کنٹرول پر اشتعال انگیزیوں کا سلسلہ جاری ، بھارتی فوج کی مختلف سیکٹرز پر بلااشتعال فائرنگ اور گولہ باری کے نتیجے میں پاک فوج کا1 جوان اور2شہری شہید جبکہ 2 فوجی اور 5شہری زخمی ہوگئے ، پاک فوج نے بھرپور جوابی کاروائی کرتے ہوئے دشمن کے متعدد مورچوں کو تباہ کردیا جس کے نتیجے میں5بھارتی فوج جہنم واصل ہوگئے ۔
بدھ کو پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے نیزہ پیر ، سبز کوٹ اور کیانی سیکٹرز پر فوجی چوکیوں پر بلااشتعال فائرنگ کی جس کے نتیجے میں ایک فوجی جوان شہید اور2شدید زخمی ہوگئے ۔بھارتی فوج نے مقامی آبادی پر بھی گولہ باری کی جس کے نتیجے میں 2شہری شہید اور 5زخمی ہوگئے ۔ آئی ایس پی آر کے مطابق پاک فوج کی موثر جوابی کاروائی کے بعد دشمن کی گنیں خاموش ہوگئیں ۔ واضح رہے کہ اس سے قبل ایل او سی پر بھارتی اشتعال انگیزیوں کے نتیجے میں فوجی اور سویلین شہادتوں پر دفتر خارجہ میں بھارتی ڈپٹی ہائی کمشنر کو طلب کر کے شدید احتجاج کیا گیا ۔
