کراچی (نیوزڈیسک)پاکستان تحریک انصاف کے چیئرمین عمران خان اور رہنما عارف علوی کے خلاف سندھ ہائی کورٹ میں درخواست دائر کی گئی ہے۔ ایڈووکیٹ رانا فیض الحسن کی جانب سے دائر کی گئی درخواست میں موقف اختیار کیا گیا ہے کہ اسلام آباد میں دھرنے کے دوران پی ٹی وی پر حملے سے متعلق عمران خان اور عارف علوی کے درمیان ہونے والی ٹیلی فونک منظر عام پر آنے کے بعد ثابت ہوگیا ہے کہ عمران خان اور تحریک انصاف کے دیگر رہنما بدامنی پھیلانے میں ملوث رہے ہیں جو کہ آئین کی خلاف ورزی ہے۔ اس لئے عدالت عالیہ سے استدعا ہے کہ عارف علوی کو نااہل قرار دیا جائے اور عمران خان کے خلاف بدامنی پھیلانے سے متعلق کارروائی کی جائے۔واضح رہے کہ چند روز قبل دونوں رہنماؤں کے درمیان ہونے والی ٹیلی فونک گفتگو منظرعام پر آئی تھی جس میں عارف علوی نے عمران خان کو فون کے ذریعے پی ٹی وی کی نشریات بند ہونے سے متعلق ا?گاہ کیا جس پر تحریک انصاف کے چیرمین نے خوشی کا اظہار کیا تھا۔