ٹوکیو(نیوز ڈیسک )جاپانی ماہرین کا تیار کر دہ دنیا کا پہلا بولنے والا خلاباز روبوٹ اپنے18 ماہ پر محیط خلائی سفر کے بعد واپس زمین پر آگیا ہے اور آتے ہی دو عالمی ریکارڈ بھی جیت لئے۔ کیربو نامی اس خلاء باز روبوٹ کو گزشتہ دن جاپان میں خلاءمیں بات چیت کرنے اور زمین سے بحیثیت روبوٹ بلند ترین مقام یعنی خلاءمیں پہنچنے کے اعزاز کے صلے میں دو عالمی ریکارڈ کے سر ٹیفیکیٹ دئیے گئے۔ کیربو کو 18ماہ قبل خلاءبازوں کے ساتھ انٹرنیشنل اسپیس اسٹیشن بھیجا گیا تھا۔ 34سینٹی میٹر قدو قامت والے اس روبوٹ میں بولنے اور پوچھے گئے سوالات کا جواب دینے کی مکمل صلاحیت موجود ہے، جس کا عملی مظاہرہ اس روبوٹ نے اسپیس میں اپنے دورے کے دوران کر کے دکھایا اور دنیا کو حیران کرتے ہوئے واپسی پر عالمی ریکارڈ بھی جیت لئے۔ خلاءمیں اس روبوٹ کی ذمہ داری کسی جسمانی مشقت کے بجائے خلابازوں کے لیے ایک دوست کی تھی اور اسی مقصد کے لیے اسے تیار کیا گیا تھا۔ کیربو کے کامیاب مشن اور واپسی کے بعد دوسرے34 سینٹی میٹر لمبے خلاءباز روبوٹ میراٹا کو بھی عنقریب انٹر نیشنل اسپیس اسٹیشن روانہ کیا جائے گا