اسلام آباد(مانیٹرنگ ڈیسک) پاکستان عوامی تحریک کے سربراہ علامہ ڈاکٹر طاہر القادری نے کہا ہے کہ پانامہ کے حوالے سے جو کچھ ہو رہا ہے، جے آئی ٹی سمیت جو کچھ ہو رہا ہے یہ صرف ایک ڈرامہ ہے، جے آئی ٹی فرشتوں کی طرح کمرے میں بند بیٹھی ہے۔
نہ ان کی کسی نے شکل دیکھی ہے۔ نہ وہ کسی سے بات کرتے ہیں، اندر بیانات ہوتے ہیں یا نہیں یہ بھی کسی کو نہیں پتہ، نہ ہی کوئی مخالف وکیل یا فریق اندر جا سکتا ہے اور نہ ہی کوئی اور۔ جے آئی ٹی والے اپنی زبان سے بھی کسی کو کچھ نہیں بتاتے۔ شریف خاندان کےلوگ اندر خود جاتے ہیں، اللہ ہی جانے کہ اندر ان کا بیڈ روم لگا ہوا ہے ، یا انہیں کھانا کھلایا جاتا ہے، اندرکیا پتہ ان کا عارضی رہائشی کمرہ بنایا ہوا ہے۔ یا وہ ٹی وی دیکھتے ہیں اور عزت و احترام کے ساتھ اندر بیٹھ کر باہر آ تے ہیں، ایک جو سکرپٹ لکھا ہوا ہوتا ہے جس کے مطابق باہر آکر وہ بیان دے دیتے ہیں۔ میڈیا والوں کو سوال کرنے کی بھی اجازت نہیں ہوتی۔ یہ بھی (ن) لیگ والے ہی بتاتے ہیں کہ ان سے سوالات ہوتے ہیں ، اور کسی کو کچھ پتہ ہی نہیں۔یہ ایک مکمل ڈرامہ ہے جس میں پوری قوم کو بے وقوف بنایا جا رہا ہے۔ وہ لوگ رونے والے ہیں جو انصاف کے انتظار میں بیٹھے ہیں، کیونکہ انہیں انصاف نہیں ملنے والا۔ طاہر القادری نے اپنے وڈیو پیغام میں کہا کہ یہ قوم کے ساتھ ایک بھونڈا اور سنگین مذاق ہے جس میں الیکشن 2018 کی تیاری ہو رہی ہے۔
