کابل(آئی این پی)افغانستان نے پاکستان کے حقانی نیٹ ورک کے کابل سے کاروائیاں کرنے سے متعلق دعوے کو مسترد کرتے ہوئے کہا ہے کہ ایسے وقت میں جب امریکہ خطے میں دہشتگردی کے حوالے سے اپنی نئی حکمت عملی کا اعلان کرنے والا ہے پاکستان اس طرح کے تبصروں کے ذریعے بین الاقومی برادری کو گمراہ کرنا چاہتا ہے ۔
جمعہ کو افغان میڈیا کے مطابق وزارت دفاع کے ترجمان دولت وزیری نے پاکستانی دفتر خارجہ کے حقانی نیٹ ورک سے متعلق بیان پر ردعمل ظاہر کرتے ہوئے کہاکہ پاکستان امریکہ اور بین الاقومی برادری کے خطے میں عسکریت پسند گروپوں کے حوالے سے موقف سے اپنے مقاصد حاصل کرنے کی کوشش کررہا ہے ۔ایسے وقت میں جب امریکہ خطے میں دہشتگردی کے حوالے سے اپنی نئی حکمت عملی کا اعلان کرنے والا ہے پاکستان اس طرح کے تبصروں کے ذریعے بین الاقومی برادری کو گمراہ کرنا چاہتا ہے ۔واضح رہے کہ گزشتہ روز دفتر خارجہ کے ترجمان نفیس ذکریا نے ہفتہ وار پریس بریفنگ میں کہا تھاکہ ،حقانی نیٹ ورک پاکستان میں نہیں افغانستان میں ہے ۔ طالبان اور دہشتگردی کے دیگر نیٹ ورکس کا خاتمہ کر دیا ہے۔قبائلی علاقوں میں دہشتگردوں کے خلاف بلا امتیاز کارروائی کی ہے۔بچے کچے طالبان افغانستان فرار ہوگئے ہیں۔حقانی نیٹ ورکس سمیت دہشتگرد تنظیمیں افغانستان سے آپریٹ کررہی ہیں۔
