اسلام آباد (مانیٹرنگ ڈیسک) متحدہ عرب امارات میں نسوار پر پابندی کے باوجود وہاں کی ریاست ام القوین کے ایک ریسٹورنٹ کو نسوار فروخت کرنے کی وجہ سے بند کر دیا گیا، تفصیلات کے مطابق متحدہ عرب امارات میں نسوار اور پان فروخت کرنے پر پابندی عائد ہے لیکن اس کے باوجود غیر قانونی طور پر وہاں اس کی فروخت جاری ہے متحدہ عرب امارات کے محکمہ اقتصادی ترقی کو شکایات موصول ہوئیں کہ اس
ریسٹورنٹ میں غیر قانونی طور پر نسوار فروخت ہو رہی ہے جس پر محکمہ اقتصادی ترقی کی ٹیم نے ریسٹورنٹ سے نسوار برآمد کرکے اسے سیلکر دیا۔ محکمہ اقتصادی ترقی کی انسداد منشیات ٹیم نے عوامی شکایت پر اس ریسٹوریٹ پر چھاپہ مار کر بھاری مقدار میں نسوار برآمد کر لی۔ انسداد منشیات ٹیم نے ریسٹورنٹ کو سیل کرنے کے ساتھ ساتھ وہا کے کچھ ملازمین کو بھی حراست میں لے لیا۔ محکمہ اقتصادی ترقی کے اسٹاف انسپکٹر سیف سلیم کے مطابق ریسٹوریٹ میں نسوار کی فروخت سے متعلق متعدد شکایات ملی تھیں جس پر کارروائی کی گئی اور وہاں سے بھاری مقدار میں نسوار برآمد کی گئی ہے، یہاں نسوار کی فی پڑیا 3 درہم میں فروخت کی جارہی تھی۔ خیال رہے کہ وہاں کی حکومت نے آرٹیکل 66 کے تحت نسوار اور پان کو انسانی صحت کے لئے مضر قرار دیا تھا، جب کہ مقامی حکم نامہ نمبر 2003/23 کے تحت نسوار پر پابندی عائد کی گئی تھی اس کے علاوہ ہدایت نامہ نمبر 2003/11 کے تحت پان کو انسانی صحت کے لیے مضر قرار دیا گیا تھا۔
