اسلام آباد (مانیٹرنگ ڈیسک) سٹیٹ بینک آف پاکستان کے مطابق مالی سال 2017 ء میں شرح نمو دس سال کی بلند ترین سطح پر رہی ہے، تفصیلات کے مطابق سٹیٹ بینک نے ملکی معیشت پر تیسری سہ ماہی رپورٹ جاری کی ہے جس میں کہا گیا ہے کہ مالی سال 2017ء میں زرعی شعبے میں بہتری دیکھی گئی ہے۔ کھاد پر سبسڈی اور ٹریکٹر پر سیلز ٹیکس کی کمی کے زرعی شعبے پر مثبت اثرات دیکھے جا رہے ہیں۔ پی ایس ڈی پی اورسی پیک کی

وجہ سے تعمیراتی شعبے میں تیزی دیکھی جا رہی ہے۔ امن وامان کی بہتری اورشرح سود میں کمی کے باعث کاروباری سرگرمیاں پہلے سے بہتر ہوئی ہیں۔ درآمدات میں اضافہ ہوا ہے، برآمدات اور ترسیلات زر میں کمی سے جاری کھاتوں میں اضافہ دیکھنے میں آیا ہے۔ سٹیٹ بینک کی اس رپورٹ کے مطابق مالی سال 2017ء میں شرح نمو دس سال کی بلند ترین سطح 5 اشاریہ 3 فی صد پر ہے۔ اس طرح پاکستان کا شرح نمو کا دس سالہ ریکارڈ ٹوٹ گیا ہے۔