عمان/واشنگٹن (آئی این پی)امریکا نے طویل فاصلے تک مار کرنے والے میزائل شام منتقل کردیے۔غیر ملکی میڈیا کے مطابق اردن کے انٹیلی جنس ذرائع نے بتایا ہے کہ امریکا نے طویل فاصلے تک مار کرنے والے میزائلوں کی بھاری کھیپ جنوبی شام میں اردن اور عراق کی سرحد پر واقع التنف شہر منتقل کردی ہے۔ عرب انٹیلی جنس ذرائع کا کہنا ہے کہ امریکی فوج نے بڑی تعداد میں راکٹ لانچر ٹرکوں پر لاد کر اردن سے شامل
منتقل کردیے ہیں۔ ذرائع کا کہنا ہے کہ امریکی فوج کی طرف سے طویل فاصلے تک مار کرنے والے میزائلوں کی شام میں تنصیب کا مقصد خطے میں امریکی دفاعی صلاحیت کو مزید مستحکم کرنا ہے۔ذرائع کا کہنا ہے کہ امریکا کے جدید ترین اور سریع الحرکت(ھیمرس) میزائل لانچنگ آلات صحرائی اڈے پر موجود ہیں۔تازہ پیش رفت ایک ایسے وقت میں ہوئی ہے جب التنف شہر میں امریکی فوج اور ایران نواز ملیشیا کے درمیان کشیدگی بھی عروج پر ہے۔
