لاہور(این این آئی) تحریک انصاف کے انٹرا پارٹی انتخابات میں مجموعی طور پر2لاکھ 56ہزار 957افراد نے حصہ لیا،’انصاف پینل‘‘ایک لاکھ نواسی ہزار پچپن ووٹ لیکر کامیاب،’’احتساب پینل‘‘کے حق میں اکتالیس ہزار چھ سو سینتالیس ووٹ ڈالے گئے ۔ تفصیلات کے مطابق تحریک انصاف کے چیف الیکشن کمشنر اعظم سواتی کی زیر صدارت تمام صوبائی اور ریجنل کمشنرز کا اجلاس ہوا جس میں چاروں صوبوں سے موصول ہونے والے نتائج کو حتمی شکل دی گئی۔

جس کے بعد الیکشن کمیشن کی جانب سے باضابطہ اعلان کیا گیا جس کے مطابق مجموعی طور پر دولاکھ چھپن ہزار نو سو ستاون افراد نے انتخابی عمل میں حصہ لیا۔سب سے زیادہ افراد نے پنجاب سے ووٹ ڈالے،پختونخوا دوسرے نمبر پر رہا۔’’انصاف پینل‘‘ایک لاکھ نواسی ہزار پچپن ووٹ لیکر کامیاب جبکہ ’’احتساب پینل‘‘کے حق میں اکتالیس ہزار چھ سو سینتالیس ووٹ ڈالے گئے جبکہ طریقہ کار کی خلاف ورزی کرنے پر چھبیس ہزار دوسو پچپن ووٹ مسترد کئے گئے ۔‎