کراچی(این این آئی)متحدہ علماء محاذ پاکستان کے زیراہتمام یوم عائشہ صدیقہؓ عقیدت و احترام سے منایاگیا اس موقع پر کراچی ،راولپنڈی اسلام آباد، لاہور ،حیدرآباد سمیت دیگرشہروں میںسیمینارز کا انعقاد کیاگیا۔متحدہ علماء محاذ میں شامل مختلف مکاتب فکر کے جید علماء مشائخ ،مذہبی و سیاسی زعماء نے عائشہ صدیقہؓ کی سیرت و کردار پر تفصیلی روشنی ڈالتے ہوئے کہاہے کہ سورۃ نور کی 17آئیتں ان کی پاک دامنی ،عفت و عظمت کے متعلق نازل ہوئیں جو قیامت تک پڑھی جائیں گی۔
حضرت عائشہؓ کا آنحضرتﷺ سے نکاح ارادہ مشیت الٰہی میں مقدر ہوچکاتھا۔ مردوں اور عورتوں کے علم کو جمع کیاجائے تو وہ عائشہ صدیقہؓ کے علم ،تفقہ، تقویٰ تک نہیں پہنچ سکتا۔حضور ﷺ نے فرمایا کہ مردوںمیں تو بہت سے لوگ تکمیل کوپہنچے اور عورتوں میں صرف حضرت مریم ؑ ، حضرت آسیہؓ اور عائشہ صدیقہؓ تکمیل کو پہنچیں۔صحابہ میں جب کوئی مشکل مسئلہ پیش آتا تو وہ عائشہ صدیقہؓ کی طرف رجوع کرتے۔تیمم کا حکم بھی حضرت عائشہؓ کے سبب امت کو ملا۔حضرت عائشہ صدیقہؓ سے دو ہزار سات سو احادیث مروی ہیں جن سے امت تاقیامت رشدو ہدایت پاتی رہے گی۔علمائے امت کے بقول اگر دین کے چار حصے کئے جائیں تو ایک حصہ ہمیں سیدہ عائشہ صدیقہؓ سے ملا ہے۔ آپﷺ کو لوگوں میں سب سے زیادہ حضرت عائشہ ؓ پسند تھیں۔سیدہ عائشہ صدیقہؓ کی سیرت وکردار خواتین عالم سمیت پوری امت کے لئے رشدو ہدایت و نجات کا ذریعہ ہے۔ ام المومنین سیدہ عائشہ صدیقہؓ سے عقیدت و محبت قرب الٰہی و شفاعت رسول ؐکا ذریعہ ہے علماء نے حضرت ابن عباس ؓ کے حوالے سے کہا کہ سیدہ عائشہ صدیقہ طاہرہؓ سے بغض و عناد کفر ہے۔
مولانا انتظارالحق تھانوی،مولانا قاری اللہ داد، مولانا محمد امین انصاری،مولانا سلیم اللہ ترکی،علامہ عبدالخالق فریدی،مفتی محمد بخاری، مفتی فیروزالدین ہزاروی، مولاناغلام رسول ناصر ایڈووکیٹ،مفتی وجیہہ الدین، مفتی ابرار الحق باغپتی،مفتی شبیر احمد،مفتی منیب الرحمن حیدرآبادی،خواجہ احمدالرحمن یار خان، مفتی ساجد یار خان،علامہ شاہدین اشرفی،علامہ روشن دین الرشیدی،علامہ غلام مصطفی رحمانی، علامہ مرتضیٰ خان رحمانی،
علامہ ڈاکٹر اختر محمدی،علامہ یوسف سلفی، علامہ احسن سلفی ودیگر نے حکومت سے پرزور مطالبہ کیا کہ توہین ام المومنین عائشہ صدیقہؓ پر مبنی اشتعال انگیز مواد کو ضبط اورمرتکبین کو قرار واقعی سزائیں دی جائیں، عائشہ صدیقہؓ سے منسوب چاروںصوبوں میں خواتین کے لئے یونیورسٹیز قائم کی جائیں۔پرنٹ و الیکٹرانک میڈیا یوم عائشہ صدیقہؓ کے موقع پر خصوصی اشاعت اور پروگرامز نشر کرنے کا خصوصی اہتمام کریں۔
