اسلام آباد (نیوز ڈیسک) وفاقی حکومت نے فیول سبسڈی پروگرام کے تحت مستحق افراد کو دی جانے والی پانچویں اور چھٹی قسط جون 2026 کے دوران جاری کرنے کا فیصلہ کر لیا ہے۔
ذرائع کے مطابق یہ فیصلہ نائب وزیراعظم اسحاق ڈار کی زیر صدارت منعقد ہونے والے ایک اعلیٰ سطحی جائزہ اجلاس میں کیا گیا، جہاں سبسڈی اسکیم کی مجموعی کارکردگی اور پیش رفت کا تفصیلی جائزہ لیا گیا۔
اجلاس میں ٹرانسپورٹ سیکٹر سے وابستہ افراد، موٹر سائیکل استعمال کرنے والوں اور کسانوں کے لیے فراہم کی جانے والی مالی معاونت پر تبادلہ خیال کیا گیا۔ حکام نے بریفنگ دیتے ہوئے بتایا کہ پروگرام کے آغاز سے اب تک چار اقساط کامیابی کے ساتھ ہفتہ وار بنیادوں پر تقسیم کی جا چکی ہیں۔
اعلامیے کے مطابق نائب وزیراعظم نے اسکیم کے نفاذ پر اطمینان کا اظہار کرتے ہوئے متعلقہ اداروں کو ہدایت دی کہ امدادی رقم کی شفاف اور بروقت فراہمی کو یقینی بنایا جائے۔ انہوں نے اس بات پر بھی زور دیا کہ نگرانی کے نظام کو مزید مؤثر بنایا جائے تاکہ سبسڈی کا فائدہ حقیقی مستحقین تک پہنچ سکے۔
اجلاس میں شفافیت، احتساب اور وفاقی و صوبائی اداروں کے درمیان تعاون کے مختلف پہلوؤں پر بھی غور کیا گیا۔ اسحاق ڈار نے ہدایت کی کہ اسکیم کے انتظامی امور کو مزید بہتر بنایا جائے تاکہ عوام کو زیادہ سے زیادہ ریلیف فراہم کیا جا سکے۔
اس جائزہ اجلاس میں معاون خصوصی طارق باجوہ، سیکرٹری پٹرولیم، چاروں صوبوں کے چیف سیکرٹریز اور دیگر سینئر حکام نے شرکت کی۔
