ریاض(آئی این پی) فرانس کے بین الاقوامی کھلاڑی اور مانچسٹر یونائیٹڈ کلب کے اہم ستون پال پوگبا ان دنوں عمرے کی ادائیگی کے لئے مکے میں موجود ہیں۔فٹبال کی دنیا کے مہنگے ترین کھلاڑی پال پوگبا ان دنوں عمرے کی ادائیگی کے لئے مکے میں موجود ہیں۔ مکے کی فضاں میں جانے سے صرف 3 روز قبل ہی پال پوگبا نے یورپا لیگ میں مانچسٹر یونائیٹڈ کی نمائندگی کی تھی اور ان کی ٹیم نے یورپا لیگ کپ کا فائنل بھی اپنے نام کیا تھا۔

سیزن کے اختتام پر پال پوگبا نے ایک سوٹ کیس کے ہمراہ اپنی ایک ویڈیو جاری کی تھی جس میں ان کا کہنا تھا کہ وہ عبادت کی غرض سے سفر کر رہے ہیں اور اس دوران وہ عمرہ کی ادائیگی کریں گے۔گزشتہ روز پال پوگبا نے مکے سے اپنی تصویر پوسٹ کرکے تحریر کیا تھا کہ دنیا کی سب سے خوبصورت جگہ اور چیز جو میں اپنی زندگی میں دیکھ رہا ہوں، پال بوگبا نے پوری امت مسلمہ کو رمضان کی مبارکباد بھی پیش کی۔واضح رہے کہ 24 سالہ فرانسیسی فٹبالر پال پوگبا اس سے قبل بھی حج کی ادائیگی کے لئے مکے کا سفر کرچکے ہیں۔ انہیں گزشتہ برس دنیا کا سب سے مہنگے کھلاڑی بننے کا بھی اعزاز حاصل ہوا جب انگلش فٹبال کلب مانچسٹر یونائیٹڈ نے اطالوی کلب یووینٹس سے آٹھ کروڑ 90 لاکھ پانڈ کی ریکارڈ قیمت کے عوض پوگبا کی خدمات حاصل کیں تھیں۔