بیجنگ ( این این آئی )چین ، افغانستان اور پاکستان عملی تعاون مذاکرات کا پہلا دور گزشتہ روز بیجنگ میں منعقد ہوا جس میں دوطرفہ تعاون پر تفصیلی تبادلہ خیال کیا اور اس مقصد کیلئے عملی اقدامات کرنے پر اتفاق کیاگیا۔
پاکستان کی وزارت خارجہ کے ڈائریکٹر جنرل منصور احمد خان ،چین کی وزارت خارجہ کے ڈائریکٹر جنرل ژیو کیون اور افغانستان کی وزارت خزانہ کے ڈائریکٹر جنرل خالدپیندہ نے مشترکہ طور پر مذاکرات کی صدارت کی۔اجلاس میں کہا گیا کہ افغانستان اور خطے میں امن ، استحکام اور ترقی کیلئے پاکستان ، چین اور افغانستان کے درمیان سہ فریقی تعاون ناگزیر ہے۔تینوں ممالک نے پاک چین اقتصادی راہداری اور علاقائی روابط کے فروغ کیلئے اس کے فوائد کی تعریف کی۔ اجلاس میں ایک خطہ ایک سڑک منصوبے کے لائحہ عمل کے تحت باہمی فوائد او ر علاقائی اقتصادی استحکام کے فروغ کی غرض سے مختلف شعبوں میں عملی تعاون بڑھانے پر اتفاق کیا گیا۔چین اور پاکستان نے بنیادی ڈھانچے، توانائی، تعلیم، صحت، زراعت، انسانی وسائل کی تربیت کے شعبوں اور افغانستان کی ضروریات پر مبنی استعداد کار بڑھانے کیلئے سہ فریقی تعاون کے مواقع کا جائزہ لینے پر بھی اتفاق کیا۔
