لاہور ( این این آئی)ممتازتاجر رہنما وفیروز پور بورڈ لاہور کے سینئر نائب صدر خادم حسین نے کہا ہے کہ پاکستانی معیشت میں بہتری سے غیر ملکی زرمبادلہ کے ذخائر میں اضافہ ہورہا ہے ،اقتصادی راہداری منصوبے سے پائیدار گروتھ، مالیاتی خسارہ میں کمی اور افراط زر کی صورتحال میں بہتر ی آئی ہے عالمی کریڈیٹ ریٹنگ ایجنسی موڈیر انویسٹر سروس نے بھی پاکستان کی معاشی صورتحال پر اطمینان کا اظہار کیا ہے ۔

ان خیالات کا اظہار انہوں نے فیروز پور بورڈ کے تاجروں کے وفد سے گفتگو کرتے ہوئے کیا۔ خادم حسین نے کہا کہ حکومتی اقدامات سے پاکستانی معیشت استحکام پذیر ہے پاکستانی سٹاک ایکسچینج 51000انڈیکس کی تاریخی سطح پر پہنچ چکی ہے جو سرمایہ کاروں کی پاکستانی معیشت پر اعتماد کا عملی ثبوت ہے ۔انہوںنے کہا کہ آئی ایم ایف کے 3سالہ توسیع فنڈ سہولت پروگرام کی کامیاب تکمیل کے بعد چین پاکستان اقتصادی راہداری منصوبے کے آغاز سے گروتھ کے امکانات بہتر ہوئے ہیں ۔غیر ملکی سرمایہ کاروں کی پاکستان میں سرمایہ کاری میں اضافہ کیلئے اقتصادی اصلاحات میں تیزی آئی ہے جس سے غیر ملکی سرمایہ کاروں کا پاکستان کی طرف رخ ہوگیا ہے اور بڑی بڑی کمپنیاں پاکستان میں اپنی انڈسٹریز لگانے کی منصوبہ بندی پر عمل پیرا ہے۔جس سے جہاں صنعتی ترقی ممکن ہوسکے گی وہاں لاکھوں ملازمت کے مواقع بھی دستیاب ہونگے اور ملک سے بے روزگاری جیسے سنگین مسئلہ کے حل میں بھی مدد ملے گی۔