اسلام آباد(مانیـٹرنگ ڈیسک)پی ایس ایل میں فکسنگ کیلئے کھلاڑیوں کو ناصر جمشید نے اکسایا، جواری فکسنگ کیلئے کھلاڑیوں کے رشتہ داروں کو استعمال کرتے ہیں،لاہور میں ہونیوالے فائنل نے ٹی وی ریٹنگ کے ریکارڈ توڑ دئیے، پی ایس ایل 3کے 8میچز پاکستان میں کرائیں گے جن میں سے 4لاہور اور 4کراچی میں منعقد کئے جائیں گے، قومی اسمبلی کی قائمہ کمیٹی

برائے بین الصوبائی رابطہ کے اجلاس میں بریفنگ۔ تفصیلات کے مطابق قومی اسمبلی کی قائمہ کمیٹی برائے بین الصوبائی رابطہ کے اجلاس میںچیئرمین پی سی بی شہریار خان نے پی ایس ایل فکسنگ کے حوالے سے بتایا ہے کہ فکسنگ کیلئے کھلاڑیوں کو ناصر جمشید نے اکسایاجو کہ برطانیہ میں ہیں جہاں برطانوی ایجنسی ان سے تحقیقات کر رہی ہے جبکہ ایک کھلاڑی کو فکسنگ میں ملوث ہونے پر سزا دیگر کے خلاف تحقیقات جاری ہیں۔ انہوں نے انکشاف کرتے ہوئے بتایا کہ جواری فکسنگ کیلئے کھلاڑیوں کے رشتہ داروں کو استعمال کرتے ہیں ۔ اس موقع پر قائمہ کمیٹی کے رکن شفقت حیات پی سی بی حکام پر برس پڑے انہوں نے سوال کرتے ہوئے پوچھا کہ میچ فکسنگ میں کھلاڑیوں کے قیام کرنے والے ہوٹل کی انتظامیہ سے کیوں تحقیقات نہیں کی گئی جبکہ فکسنگ میں ملوث کھلاڑیوں کی ٹیموں کے منیجرز ابھی تک تحقیقات کے دائرے میں نہیں لائے گئے۔ کمیٹی کے اجلاس میں یہ سوال بھی اٹھایا گیا کہ فکسنگ میں ملوث کھلاڑیوں کو بار بار موقع کیوں اور کون دلوا رہا ہے ۔ پاکستان کرکٹ بورڈ کے چیف آپریٹنگ آفیسر سبحان احمد نے کمیٹی کو بریفنگ دیتے ہوئے بتایا کہ پی ایس ایل فائنل نے ٹی وی ریٹنگ کے تمام ریکارڈ توڑ دئیے ہیں، پاک بھارت میچ پر ریٹنگ 10پوائنٹس جبکہ پی ایس ایل فائنل میچ کی ٹی وی ریٹنگ 21پوائنٹس ریکارڈ کی گئی ہے۔ اس موقع پر سبحان احمد کا کہنا تھا کہ پی ایس ایل 3کے 8میچز پاکستان میں منعقد کروائے جانے کا فیصلہ کیا گیا ہے جس میں 4لاہور اور 4کراچی میں منعقد کروائے جائیں گے۔