پشاور(این این آئی)عبدالولی خان یونیورسٹی کے مقتول طالب علم مشال قتل کیس میں مزید پیش رفت ہوئی ہے ٗ پولیس نے اہم ملزم بلال بخش سمیت دو ملزمان کو گرفتار کرلیا ۔ پولیس کے مطابق مشال خان قتل کیس میں اہم ملزم کو گرفتار کرلیا گیا ٗ گرفتار ملزم بلال بخش یونیورسٹی کا سیکیورٹی انچارج ہے۔

ملزم بلال پر الزام ہے کہ انہوں نے طلبہ کے مجمع کو اکھٹا کر کے اشتعال دلایا۔ کیس میں پہلے سے گرفتار ملزم وجاہت نے بھی عدالت میں اپنے ریکارڈ کیے گئے ،بیان میں کہا تھا کہ سکیورٹی انچارج بلال بخش نے نے انہیں کہا کہ جس نے مشال کی طرفداری کی اس سے بھی سختی سے نمٹا جائے گا اور وہ خود مشال کو ماریں گے۔ کیس میں گرفتار دوسرا ملزم یونیورسٹی کا طالب علم عامر تنگی ہے جسے ویڈیوں کے ذریعے شناخت کے بعد گرفتار کیا گیا ہے۔ کیس میں گرفتار ملزمان کی تعداد چھتیس ہوگئی ہے ۔