واشنگٹن (آئی این پی )امریکی ٹی وی نے دعویٰ کیا ہے کہ شمالی کوریا نے چھٹے ایٹمی دھماکے کی تیاری کرلی ہے،جوہری تجربات آج ( ہفتہ) کوکئے جائیں گے شمالی کوریا کے ٹی وی پر ممکنہ چھٹے ایٹمی تجربے کا مقام دکھایا گیا۔ دھماکا آج ( ہفتہ) کوکیا جاسکتا ہے۔ امریکی ٹی وی کے مطابق امریکا کی صدرکی دھمکیوں کے باوجود شمالی کوریا کے لیڈر کم جونگ ان دھماکے کرکے ڈونلڈ ٹرمپ کو اپنی طاقت دکھانا چاہتے ہیں۔
جاپان کے وزیراعظم شنزو ایبی نے ٹوکیو سے جاری بیان میں کہا کہ شمالی کوریا میزائلوں کے ذریعے زہریلی گیس پھینکنے کی صلاحیت رکھتاہے۔ پیانگ یانگجنوبی کوریا یا دیگر ممالک میں اعصابی گیس سے حملہ کرسکتا ہے۔جبکہ چین نے امریکا کی جانب سے شمالی کوریا کے قریب فوجیں جمع کرنے اور امریکی صدر کے دھمکی آمیز بیانات پر سخت ردعمل ظاہر کیا ہے۔ چین نے کہا ہے کہ شمالی کوریا کے معاملے پر تنازع کو ہوا دینے والا فریق اس کی قیمت بھی چکائے گا۔چین کا کہنا ہے کہ شمالی کوریا کے معاملے پر کسی وقت بھی لڑائی ہو سکتی ہے اور اس جنگ میں کوئی فاتح نہیں ہو گا۔اس سے پہلے امریکی صدر نے سماجی رابطے کی ویب سائٹ پر ٹوئٹ کرتے ہوئے کہا تھا کہ انہوں نے چینی صدر پر واضح کیا کہ امریکا اور چین کے درمیان تجارت بہتر ہو سکتی اگر وہ شمالی کوریا کے مسئلے کو حل کر سکتے ہیں۔ڈونلڈ ٹرمپ کا یہ بھی کہنا تھا اگر چین نے اس مسئلے پر توجہ نہ دی تو پھر امریکہ خود ہی اس مسئلے کو چین کے بغیر حل کرنے میں سامنے آئے گا۔واضح رہے امریکہ نے شمالی کوریا پر حملہ کرنے کی تیاری مکمل کر لی ہے کیونکہ اس حملے کا مقصد شمالی کوریا کو ایٹمی تجربہ کرنے سے روکنا ہے۔
