اسلام آباد(مانیٹرنگ ڈیسک)افغان خفیہ ایجنسی این ڈی ایس اور ’’را‘‘مجھے قتل کرنا چاہتے ہیں، میرے خلاف نفرت انگیز مہم بھارتی خفیہ ایجنسی کی ایما پر چلائی جا رہی ہے،افغان رکن پارلیمنٹ عبداللطیف پیدرام نے بھارتی خفیہ ایجنسی کی افغانستان میں سرگرمیوں کا پول کھول دیا۔ تفصیلات کے مطابق افغان رکن پارلیمنٹ اور افغان نیشنل کانگریس کے سربراہ عبداللطیف پیدرام نے ایک افغان اخبار کو دئیے گئے اپنے ایک انٹرویو میں انکشاف کیا ہے کہ افغان خفیہ ایجنسی این ڈی ایس

اور بھارتی خفیہ ایجنسی ’’را‘‘انہیں قتل کروانا چاہتی ہے ۔ ان کا کہنا تھا کہ ان کے خلاف افغانستان میں نفرت اور تعصب پر مبنی مہم کے پیچھے دراصل بھارتی خفیہ ایجنسی ’’را‘‘کا ہاتھ ہے اور وہ پاک افغان کشیدگی کی آڑ میں افغانستان میں بھارتی مفادات کو آگے بڑھانا چاہتی ہے۔ عبداللطیف پیدرام قومیت کے اعتبار سے ایک تاجک ہیں جو افغانستان کے بدخشاں صوبے سے وولیسی جرگہ کے رکن منتخب ہوئے ہیں جو کہ افغان پارلیمنٹ کا ایوان زیریں کہلاتا ہے۔عبداللطیف کا مزید کہنا تھا کہ افغانستان کے 80فیصد عوام چاہتے ہیں کہ پاکستان کیساتھ افغانستان بارڈر مینجمنٹ کے حوالے سے مسائل حل کرے تاکہ بارڈر کے دونوں اطراف کے رہنے والوں کو آسانی میسر آسکے۔ انہوں نے کہا کہ افغان خفیہ ایجنسی این ڈی ایس بھی ان کے خلاف متحرک ہو چکی ہے اور قومی سلامتی کونسل کی ایما پر ان کے خلاف من گھڑت مقدمات اور الزامات گھڑنے کی تیاری کر رہی ہے۔ واضح رہے کہ پاک افغان کشیدگی کے دوران افغان رکن پارلیمنٹ نےڈریونڈ لائن کو مستقل پاک افغان بارڈر تسلیم کرنے کے حوالے سے بیان دیتے ہوئے کہا تھا کہ اس سے یقینی طور پر پاک افغان کشیدگی میں کمی ہو گی۔جس پر ان کے خلاف افغانستان میں

آسمان سر پر اٹھا لیا گیا اور متعدد اراکین صوبائی اسمبلی نے ان کی پارلیمنٹ کی رکنیت منسوخ کرنے اور انہیں سنگسار کرنے کا مطالبہ کیا تھا کہ جبکہ افغانستان ٹائمز نے بھی عبداللطیف کی جانب سے ڈریونڈ لائن کو مستقل بارڈر قرار دئیے جانے کے بیان پر ان کے خلاف اپنے ایک ایڈیٹوریل میں اسے افغانستان کے شہدا کے ساتھ مذاق قرار دیا تھا اور اسے اپنی تاریخ اور قومی فخر کے منافی قرار دیا تھا۔