اسلام آباد(آئی این پی )پارلیمنٹ ہاؤس میں صدقے کیلئے دو بکرے پہنچا دیے گئے ،بکروں کا صدقہ نکالنے کے بعد خصوصی دعا بھی کی گئی ۔ ذرائع کے مطابق پیر کی سہ پہر پارلیمنٹ ہاؤس میں صدقے کیلئے کالے اور سفید رنگ کے دو بکرے لائے گئے ، بکروں کایہ صدقہ اس لئے دیا گیا کہ موسم گرما میں بجلی کے آلات اور بھاری مشینری میں کوئی نقص پیدا نہ ہو اوربجلی کی فراہمی بغیر کسی تعطل کے جاری رہے اس مقصد کیلئے
دو بکروں کا صدقہ نکالا گیا جس کے بعد دعا کی گئی ۔ یاد رہے کہ اس سے قبل ایوان صدر اور پی آئی اے میں بھی بکرے ذبح ہو چکے ہیں۔سابقہ دور میں ایوان صدر میں بکروں کا صدقہ اس وقت کے صدر آصف علی زرداری کی سلامتی جبکہ پی آئی اے میں طیاروں کے سفر کے دوران محفوظ رہنے کیلئے صدقہ دینے کی روایت قائم ہوئی ۔ اب بجلی کی بھاری مشینری کو کسی نقص سے محفوظ رکھنے کے لئے بکروں کا صدقہ نکالا گیا ۔
