ریاض (نیوز ڈیسک): سعودی عرب کے علاقے الباحہ میں ماہرین آثارِ قدیمہ نے 1300 سال سے زائد قدیم مسجد کے آثار دریافت کیے ہیں، جہاں قبلہ رُخ دیوار پر موجود تاریخی تحریر نے بھی ماہرین کی توجہ حاصل کرلی ہے۔

سعودی محکمۂ آثارِ قدیمہ کے مطابق دریافت ہونے والی مسجد ابتدائی اسلامی دور سے تعلق رکھتی ہے۔ مسجد کی قبلے کی سمت واقع دیوار پر ایک قدیم تحریر بھی ملی ہے جو صدیوں گزرنے کے باوجود محفوظ ہے۔

ماہرین کے مطابق تحریر میں اللہ تعالیٰ اور نبی کریم حضرت محمد ﷺ کا ذکر موجود ہے۔ اس کے علاوہ نیک افراد کے لیے دعائیں بھی تحریر کی گئی ہیں۔

تاریخی عبارت میں نبی کریم ﷺ پر درود و سلام اور برکت کی دعائیں بھی شامل ہیں، جس سے اس دور کے مذہبی رجحانات اور تحریری روایت کے بارے میں اہم معلومات حاصل ہوتی ہیں۔

ماہرین آثارِ قدیمہ کا کہنا ہے کہ یہ دریافت ابتدائی اسلامی دور میں الباحہ کے علاقے کی مذہبی سرگرمیوں، طرزِ تعمیر اور تاریخی ورثے کو سمجھنے کے حوالے سے غیر معمولی اہمیت رکھتی ہے۔