لاہور (آئی این پی) پاکستان ون ڈے اور ٹی ٹوئنٹی ٹیم کے کپتان سرفراز احمد نے کہا ہے کہ بھارت پاکستان کے ساتھ کھیلنے سے خوف زدہ ہے ،پاکستان نے بھارت کے ساتھ کھیلنے کے لیے ہمیشہ پہل کی۔ اپنے ایک انٹرویو دیتے ہوئے سرفراز احمد نے کہا کہ بھارت کو مثبت جواب دینا چاہیے اور کرکٹ کھیلنے کے لئے آگے آنا چاہئے۔انہوں نے مزید کہا کہ بھارت کے خلاف کھیلنا ہمیشہ اچھا لگتا ہے، لیکن لگتا ہے کہ وہ ہمارے ساتھ
کھیلنے میں خوف زدہ ہے۔پاکستان کرکٹ ٹیم کے کپتان نے یہ بھی کہا کہ کامران اکمل کی ٹیم میں واپسی ہوئی ہے ،لیکن وہ ان سے پریشان نہیں ہیں اور نہ کامران اکمل مجھ سے خوف زدہ ہے۔ واضح رہے کہ بھارتی کرکٹ بورڈ نے پاکستان سے سیریز کیھلنے کے لئے اجازت کے لئے حکومت کو خط لکھ دیا ہے ، پاکستان اور بھارت کے درمیان سیریز رواں سال کھیلی جانی ہے ، بی سی سی آئی نے پی سی بی کو سبز باغ دکھاتے ہوئے بگ تھری کی حمایت کے بدلے چھ سیزیز کھیلنے کا معاہدہ کیا تھا۔ بھارتی میڈیا میں سرفراز احمد کے بیان پر شدید ردعمل دیکھنے میں آیا ہے ،بھارتی میڈیا کے مطابق مودی سرکار نے بھارتی کرکٹ بورڈ کو پاکستان سے سیریز کرانے کی اجازت دینے سے انکار کردیا ہے۔ اس سلسلے میں بھارت کے وزیر مملکت برائے امور داخلہ ہنس راج آہیرنے کہا کہ انہیں بھارتی کرکٹ بورڈ کی جانب سے پاکستان سے نیوٹرل وینیو پر سیریز کی اجازت کے لیے لکھے گئے خط کا علم نہیں۔ اگراس قسم کی کوئی سفارش آئی تو اس پر ضرور غور کیا جائے گا لیکن وہ سمجھتے ہیں ابھی دونوں ملکوں کے درمیان کرکٹ کی بحالی کا وقت نہیں آیا۔ ہنس راج آہیر کا مزید کہنا تھا کہ پاک بھارت کرکٹ سیریز کے لیے وقت سازگار نہیں ، اس لیے اس صورت حال میں دونوں ممالک کے درمیان نیوٹرل وینیو پر بھی سیریز کی اجازت نہیں دی جاسکتی۔
