اسلام آباد(مانیٹرنگ ڈیسک)چارسدہ کچہری پر دہشتگردوں کا حملہ ناکام بنانے والے پولیس اہلکاروں کی جوانمردی پر آرمی چیف جنرل قمر جاوید باجوہ بھی عش عش کر اٹھے۔ آرمی چیف جنرل قمر جاوید باجوہ نے چارسدہ حملے میں سکیورٹی فورسز کے رد عمل کو قابل تحسین قرار دیا ہے۔ آئی ایس پی آر کے مطابق آرمی چیف جنرل قمر جاوید باجوہ
نےاپنے بیان میں سکیورٹی فورسز کے دہشتگردوں کے خلاف ردعمل کو قابل تحسین قرار دیا ہے۔آرمی چیف نے شہادتوں پر افسوس اور دکھ کا اظہار کرتے ہوئے لواحقین سے اظہار ہمدردی کیا ہے۔قبل ازیں چارسدہ دھماکے کے عینی شاہد تحصیل ممبر منظور تنگی نے نجی ٹی وی پروگرام سے گفتگو کرتے ہوئے کہا کہ میں دھماکوں کے وقت کچہری کے قریب ہی کھڑا تھا۔ میں نے دیکھا کہ اچانک فائرنگ شروع ہوئی اور خودکش حملہ آوروں نے کچہری میں داخل ہونے کی کوشش کی جس پر سیکورٹی اہلکاروں نے اپنی جان کی بازی لگا دی اور انہیں اندر داخل ہونے سےروکےرکھا۔ اسی اثنامیں ایک خود کش حملہ آور کچہری کے گیٹ سے اندر داخل ہوا اور خود کو دھماکے سے اڑا لیا اور باہر موجود خود کش حملہ آور کو پولیس اہلکاروں نے مار دیا۔ موقع پر موجود تمام پولیس اہلکاروں نے جوانمردی سے کارروائی کرتے ہوئے خود کش حملہ آوروں کو نشان عبرت بنا دیا ۔ منظور تنگی کا کہنا تھا کہ اگر دہشتگرد کچہری میں داخل ہو جاتے تو بڑی اور خوفناک تباہی ہونی تھی ۔ بعد ازاں تیسرے خود کش حملہ آور کو جو کچہری کے اندر سے فائرنگ کر رہا تھا پولیس نے اسے بھی مار گرایا۔
