ریاض (آئی این پی)سعودی عرب نے اپنی سرحدوں کی نگرانی کیلئے فضائی غبارے کا ابتدائی تجربہ کامیابی سے مکمل کر لیا جس کے بعد اس جاسوس غبارے کو سعودی مملکت کی سرحدوں پر مسلح افواج کی معاونت کے لیے چھوڑا جائے گا۔غیر ملکی میڈیا کے مطابق سعودی عرب نے اپنی سرحدوں کی
نگرانی کیلئے فضائی غبارے کا ابتدائی تجربہ کامیابی سے مکمل کر لیا ہے ۔

شہزادہ سلطان جدید ٹیکنیکل ریسرچ انسٹی ٹیوٹ نے اس فضائی غبارے کو تیارکیا ہے جب اسے تجرباتی طور پر چھوڑا گیا تو اسے دیکھ کر عوام نے حیرت کا اظہار کیا ۔ ادارے کے چیئرمین سامی الحمیدی نے بتایا ہے کہ اس میں رات اور دن کی روشنی میں دیکھنے والے کیمرے نصب ہیں۔یہ ریڈارز کے ساتھ ساتھ منسلک ہوگا اور ایسے غباروں کی مدد سے سرحدوں پر کسی بھی مشتبہ سرگرمی کا سراغ لگایا جا سکے گا۔انھوں نے مزید بتایا ہے کہ کنٹرول روم میں فضائی غبارے کے ذریعے 360 درجے تک منظر کشی کی جاسکتی ہے۔ یہ مسلسل چودہ روز تک زیادہ سے زیادہ دو ہزار فٹ کی بلندی پر پرواز کرسکتا ہے۔