دبئی (آئی این پی )متحدہ عرب امارات کے شہر دبئی میں ایک پاکستانی ٹیکسی ڈرائیور نے ایک لاکھ 80ہزار درہم اسکے مالک کو لوٹا کر ایمانداری کی نئی مثال قائم کردی ۔خلیج ٹائمز کے مطابق 36سالہ پاکستانی ٹیکسی ڈرائیور 20سال کی عمر میں دبئی میں آیا تھا جہاں وہ کئی سالوں سے ایمانداری کے ساتھ اپنا کام کررہا ہے ۔

ایک مرتبہ خالد کی ٹیکسی میں ایک سواری اپنا بیگ بھول گئی جس میں ایک لاکھ 80ہزار درہم اور پاسپورٹ بھی موجود تھا جو اس نے چند گھنٹوں میں مالک تک پہنچا کر ایمانداری کی نئی مثال قائم کردی ۔خالد کا کہنا ہے کہ ایمانداری میرے لیے سب کچھ ہے میں کبھی بھی ایسی رقم کو اپنے پاس رکھنے کا سوچ بھی نہیں سکتا تھا جو میری نہیں ہے ۔خالد کا کہنا تھاکہ اس نے سواری کا سامان فوری طور پر کمپنی کے پاس لے کر گیا جہاں سے پولیس کو اطلاع دی گئی اور سامان اسکے مالک کے پاس پہنچا دیا گیا ۔بعد ازاں خالد کو اسکی ایمانداری کے صلے میں پاکستان ایسوسی ایشن دبئی کے سیکرٹری جنرل فیصل اکرام نے حوصلہ افزائی کیلئے اسے نقد انعام اور سرٹیفکیٹ سے بھی نوازا۔