لندن(مانیٹرنگ ڈیسک) بارشوں اور بر ف باری نے امریکہ اور کئی یورپی ممالک میں نظام زندگی معطل کردیاہے،گزشتہ ہفتے سے جاری سردی کی لہر نے یورپ میں 61 افراد کی جان لے لی ہے۔ غیرملکی میڈیاکی رپورٹس کے مطابق برطانیہ کےکئی علاقوں میں طوفانی ہواؤں سےگاڑیاں الٹ گئیں ، 80 پروازیں منسوخ کردی گئیں۔
سکاٹ لینڈ میں سڑکوں پر ٹریفک جام کی وجہ سے رش بڑھ گیا ۔ادھرترکی میں 5روز میں122سینٹی میٹر برف پڑ چکی ہے۔ چند علاقوں میں اسکول تاحال بند اور سینکڑوں پروازیں منسوخ ہو گئیں ہیں۔برفباری نے سربیا، ہنگری اور یونان میں بھی بے گھرتارکین وطن کو موسم کی سختیوں کا شکار کردیا ہے۔رومانیہ، بولیویا، پرو اور اٹلی میں بھی برفباری سے نظام زندگی مفلوج ہے۔
