اسلام آباد(آئی این پی)تحریک انصاف کے چیئرمین عمران خان نے سپریم کورٹ کے باہر میڈیا ٹاک سے گریز کرتے ہوئے کہا ہے کہ اسلام آباد کا موسم بدلا ہے،امید ہے سپریم کورٹ کا موسم بھی بدلے گا،پاکستان کیلئے خوشگوار وقت آرہا ہے،دعا ہے کہ پانامہ کا مسئلہ حل ہو اور ملک آگے بڑھے۔تفصیلات کے مطابق بدھ کو تحریک انصاف کے چیئرمین عمران خان پانامہ کیس کی سماعت کیلئے سپریم کورٹ پہنچے تو میڈیا کے اصرار پر انہوں نے واپسی میں بات کرنے کی یقین دہانی کروائی اور کہا کہ اسلام آباد کا موسم بدلا ہے،امید ہے سپریم کورٹ کا بھی بدلے گا۔ تاہم عدالت عظمیٰ کی طرف سے سپریم کورٹ میں میڈیا ٹاک پر تشویش کے اظہارکے بعد کیس کی سماعت مکمل ہونے کے بعد عمران خان جب عدالت عظمیٰ سے باہر آئے تو انہوں نے میڈیا نمائندوں سے بات کرنے سے گریز کرتے ہوئے معذر ت کرلی اور کہاکہ عدالت نے منع کر رکھا ہے ،کوئی ٹاک نہیں ہوگی،روزانہ کی سماعت زبردست فیصلہ ہے اس فیصلے سے مطمئن ہوں،موسم خوشگوار ہے پاکستان کیلئے بھی خوشگوار وقت آرہا ہے،دعا کریں کہ یہ مسئلہ حل ہو اور ملک آگے بڑھے۔

موضوعات:تحریک انصاف عدالت کا فیصلہ عمران خان