واشنگٹن (آئی این پی)نو منتخب امریکی صدر ڈونلڈ ٹرمپ نے روسی صدر ولادیمیر پوٹن کے امریکی سفارت کاروں کو جوابا اپنے ملک سے بے دخل نہ کرنے کے عمل کو سراہا ہے۔امریکی میڈیا کے مطابق سوشل میڈیا ویب سائٹ ٹوئٹر پر اپنے ایک پیغام میں ٹرمپ نے لکھا کہ پوٹن نے اچھا قدم اٹھایا اور انہیں ہمیشہ سے ہی معلوم تھا کہ روسی صدر دانش مند ہیں۔ دریں اثنا امریکا میں ٹرمپ کی اس ٹویٹ کے رد عمل میں نہ صرف مخالف ڈیموکریٹک پارٹی بلکہ ٹرمپ کی اپنی ری پبلکن پارٹی کے چند سیاست دانوں کی جانب سے بھی اعتراضات سامنے آئے ہیں۔ عنقریب اپنے عہدے سے رخصت ہونے والے امریکی صدر باراک اوباما کی انتظامیہ نے صدارتی انتخابات میں مبینہ دھاندلی کرانے کے شبے میں اسی ہفتے پینتیس روسی سفارت کاروں کو امریکا چھوڑ دینے کے احکامات جاری کر دیے تھے۔ روسی صدر پوٹن کے بقول وہ بھی انتقاما ایسا کر سکتے تھے تاہم انہوں نے ایسا کوئی قدم نہیں اٹھایا۔